Экс-хакер, затрыманы ў Расіі: за амерыканскі эпізод я адседзеў у Беларусі
Беларускага экс-хакера Сяргея Паўловіча, затрыманага ў Расіі, выпусцілі праз некалькі гадзін пасля затрымання. Пра гэта ён сам расказаў у каментары dev.by.
Мужчына расказаў, што яго затрымлівалі два супрацоўнікі крымінальнага вышуку — падпалкоўнік і маёр. У пастарунку пратрымалі некалькі гадзін, памочнік пракурора апытаў Паўловіча. Потым яго адпусцілі. "Не маглі не адпусціць: у Расіі і ЗША няма дамовы аб выдачы злачынцаў", — тлумачыць экс-хакер.
Як распавядала Еўрарадыё, Паўловіча затрымалі паводле запыту Інтэрпола: у вышук ён абвешчаны Злучанымі Штатамі.
Сам былы хакер кажа, што гэты запыт звязаны з крымінальнай справай, па якой ён быў асуджаны ў Беларусі на 10 гадоў за крадзеж з чужых картак 36 мільёнаў долараў — і адбыў пакаранне.
"Я пачаў тлумачыць ім, што за амерыканскі эпізод я ўжо адседзеў у Беларусі — месяц таму я наняў адваката ў Амерыцы. І цяпер мае беларускія прысуды перакладаюцца на ангельскую і мы перасылаем іх амерыканскай пракуратуры, каб яны закрылі справу.
Такое [вышук і затрыманне па старых эпізодах нягледзячы на адбытае пакаранне] магчыма, таму што ёсць вялікі прабел у міжнародным праве, і ЗША не прызнае "адседкі", якія былі не ў ЗША. Часам прызнае "адседкі" ў Англіі", — кажа Паўловіч.
Апошнімі гадамі ён займаецца бізнесам.
