"Чэк не знайшлі, калі рабавалі ў Бучы?": што прадаюць вайскоўцы Расіі ў Беларусі
Аб'явы аб продажы тэхнікі расіянамі ў Нароўлі / калаж Еўрарадыё
У беларускім горадзе Нароўля расійскія вайскоўцы зладзілі базар, на якім прадаюць нарабаваныя ва Украіне рэчы, паведамляе Галоўнае ўпраўленне выведкі Міністэрства абароны Украіны.
Еўрарадыё паглядзела, што прапануюць на барахолках у Нароўлі і навакольных гарадах. Некалькі аб'яваў апынуліся даволі дзіўнымі.
Нейкі Андрэй прадае мабільны тэлефон у Ельску. Акрамя фатаграфій, дадзеных аб тым, колькі выкарыстоўваўся тэлефон і якія яго характарыстыкі, няма.
На старонцы ў хлопца фатаграфіі з геалакацыяй — горад Электрасталь, Маскоўская вобласць. Таксама ёсць фота ў ваеннай форме.
Яшчэ адна аб'ява аб продажы планшэта ад Яўгена. iPad прапануюць за 150 рублёў. Фатаграфіі прыкладаюцца дзіўныя. iPad чамусьці фатаграфуецца на фоне бярвення. На фота відаць рукаў колеру хакі, а твар не адлюстроўваецца ў iPad гэтак жа, як рука, быццам закрыты чымсці накшталт балаклавы.
Старонка прадаўца зачыненая, але на яго аватарцы можна разглядзець ваенных з танкам.
На адной з барахолак, дзе Яўген размяшчаў аб'яву, у каментарах паспрабавалі спытаць, адкуль iPad. Дыялог выйшаў кароткі:
На апошняе пытанне адказу не было.
У сетцы таксама з'явілася трохгадзіннае відэа з онлайн-камеры ў Расійскай кур'ерскай службе СДЭК ў Мазыры. Там расійскія вайскоўцы адпраўляюць дадому рэчы, скрадзеныя з украінскіх крам: тэлевізары, кандыцыянеры, электрасамакат, алкаголь, акумулятары.
На відэа ў салдат бачныя шаўроны 56-га гвардзейскага дэсантна-штурмавога палка Узброеных Сіл Расіі, які дыслакуецца ў Феадосіі. Падобна на тое," вызваліцелі " Украіны апынуліся звычайнымі марадзёрамі.
