Ад 1 снежня ІП пагражаюць не выйсці на працу
Такую рэзалюцыю прынялі больш 400 прадпрымальнікаў з усёй Беларусі. У панядзелак яны правялі форум у Мінску.
Пра гэта паведамляе сайт charter97.org са спасылкай на старшыню грамадскай арганізацыі "Перспектыва" Анатоля Шумчанку. Па яго словах, 25 лістапада прадпрымальнікі збяруцца на яшчэ адзін форум. Аднак бізнэсоўцы гатовыя з 1 снежня спыніць свой бізнэс. Таксама прадпрымальнікі хочуць звярнуцца ў Еўразійскі эканамічны суд, каб ён адмяніў скандальна вядомы тэхрэгламент.
Нагадаем, што 31 кастрычніка намеснік прэм'ер-міністра Пётр Пракаповіч заявіў, быццам з 1 снежня 2013 года індывідуальныя прадпрымальнікі не змогуць прадаваць тавары без дакументаў, якія пацвярджаюць іх якасць і бяспеку ў адпаведнасці з патрабаваннямі тэхнічнага рэгламенту Мытнага саюза "Пра бяспеку прадукцыі лёгкай прамысловасці".
На сённяшнім сходзе прадпрымальнікаў прысутнічаў і прадстаўнік Міністэрства гандлю Андрэй Мяшкоў. Але ён не змог растлумачыць заяву Пракаповіча, адзначае interfax.by. У адказ на просьбу ІП растлумачыць, як яны будуць працаваць з 1 снежня, ён заклікаў "гаварыць пра сённяшні дзень і аб прынятых на сёння дакументах".
Адказваючы на пытанне ІП пра меркаваныя змены ў парадак працы ІП з тэхрэгламентам і пра тое, ці не прыйдзецца ім зачыніць свае гандлёвыя кропкі з 1 снежня, Мяшкоў заявіў: "І 1 снежня, і 31 снежня вы будзеце працаваць, а мы будзем купляць тавар".
