9-гадовая беларуска намалявала 1155 малюнкаў для ізраільскіх салдат

9-гадовая беларуска Марта Барадзіна намалявала 1155 малюнкаў для ізраільскіх салдат, паведамляе DW. Яе сям'я з'ехала з Беларусі праз палітычны пераслед спачатку ў Грузію, а потым у Ізраіль. Цяпер яны жывуць недалёка ад мяжы з Сектарам Газа. 13 кастрычніка Марта з бацькам наведала валанцёрскі цэнтр, дзе збіралі пасылкі для вайскоўцаў, у кожную з іх укладваўся дзіцячы малюнак. Дзяўчынка таксама пачала маляваць — у той дзень у цэнтры яна зрабіла каля 20 малюнкаў, а затым працягнула дома. Пакуль не было заняткаў у школе, яна стварала па 50-60 малюнкаў у дзень.

На першых малюнках Марта Барадзіна пакідала нумар тэлефона, але тэлефанаванняў з падзякамі было так шмат, што перастала гэта рабіць. Дзяўчынцы таксама перадалі некалькі фота салдат, якія трымаюць у руках яе малюнкі. Па словах бацькі дзяўчынкі Алега Барадзіна, некаторыя вайскоўцы выкарыстоўваюць іх у якасці абярэгаў. Сувеніры для вайскоўцаў сталі рабіць і бацькі Марты. 

Еўрарадыё распавядала пра тое, як сям'я Алега Барадзіна збегла ад пераследу КДБ і дапамагае арміі Ізраіля.

Армія абароны Ізраіля, пасля тэрарыстычнай атакі ХАМАС 7 кастрычніка, праводзіць зачыстку ад тэрарыстаў Сектара Газа.