14:49 У Ашмянах асудзілі прадацоў спіртавых растваральнікаў
Ашмянскі раённы
суд прыгаварыў да трох з паловай гадоў пазбаўлення волі ва ўмовах агульнага
рэжыму двух мясцовых жыхароў, якія гандлявалі спіртавой вадкасцю і, магчыма,
атруцілі каля 150 чалавек. Падрабязнасці паведамляе наш карэспандэнт Зміцер
Панямонаў:
«Суд палічыў даказаным, што абвінавачаныя мужчына і жанчына прадалі
насельніцтву ад чэрвеня 2005-га да кастрычніка 2006 году больш за 7 з паловай тысяч
літраў спіртавой вадкасці.
Праваахоўнікі мяркуюць, што менавіта прададзены імі
алкаголь стаў прычынай вялікай колькасці атручванняў з дыягназам таксічны
гепатыт восенню мінулага года. Тады ў інфекцыйнае аддзяленне ашмянскага шпіталя
патрапілі каля 150 чалавек, адна жанчына памерла.
Пацвярджаюць гэты факт
знойдзеная ў гандляроў тара з-пад касметычных і бытавых растваральнікаў.
Абвінавачаныя сваёй віны ў гандлі алкагольным сурагатам не прызналі і падалі
скаргу ў Гродзенскі абласны суд. Калі ён пакіне прысуд без зменаў, ім
давядзецца заплаціць яшчэ і штраф у памеры 37,5 мільёнаў рублёў».
