У Карабаху загінуў намеснік камандуючага падводнымі сіламі Паўночнага флоту РФ

У Карабаху загінуў намеснік камандуючага падводнымі сіламі Паўночнага флоту РФ па ваенна-палітычнай працы. Капітана 1-га ранга (адпавядае званню палкоўніка) Івана Коўгана адправілі ў "камандзіроўку" два месяцы таму (па іншых звестках, яшчэ ў траўні). Ён быў намеснікам камандуючага "расійскім міратворчым кантынгентам" у Нагорным Карабаху.

20 верасня расійскія вайскоўцы трапілі пад абстрэл. Сярод загінулых быў і Коўган. Мінабароны РФ не паведаміла колькасць загінулых (па неафіцыйных даных, іх чацвёра). Вядома, што вайскоўцы вярталіся на аўтамабілі з назіральнага пункту.

Мінабароны Азербайджана не ўзяла адказнасць за здарэнне, толькі выказала "глыбокія спачуванні" ў сувязі з гібеллю расійскіх вайскоўцаў. Праводзіцца расследаванне.

Па некаторых звестках, пад абстрэлам загінуў і палкоўнік Тагір-Мурод Караеў, камандзір 29-й брыгады.

Абстрэл расійскіх вайскоўцаў адбыўся ўжо пасля дасягнення дамоўленасці пра поўнае спыненне баявых дзеянняў у Карабаху. У чацвер праходзяць перамовы паміж прадстаўнікамі самаабвешчанай рэспублікі і Азербайджана.