Суд па гібелі бацькі прафесара Астроўскага перанесены на няпэўны тэрмін
Судовы працэс адклалі ўжо другі раз.
Першы раз, 22 жніўня, абвінавачаны кіроўца буса падаў хадайніцтва пра перанос праз адсутнасць адваката. Сённяшняе слуханне перанеслі з-за таго, што сам абвінавачаны шпіталізаваны і знаходзіцца на бальнічным. Пра гэта суддзі Дзмітрыю Цівунчыку паведаміла былая жонка абвінавачанага.
Паводле афіцыйнай версіі следства Аляксандр Астроўскі, бацька прафесара Гродзенскага медуніверсітэта Алеся Астроўскага, стаў ахвярай ДТЗ. У шпіталь яго адвёз кіроўца аўто, які наехаў на яго, рухаючыся заднім ходам.
Сам прафесар Астроўскі таксама папрасіў не праводзіць пасяджэнне без абвінавачанага і перанесці слуханне:
Алесь Астроўскі: “Шкада, што ўжо другі раз запар суд не адбыўся. У дадзеным выпадку абвінавачаны зноў не з'явіўся. Усе вельмі напружаны і чакаюць гэтага суда”.
У выніку справаводства па крымінальнай справе прыпынена да выздараўлення абвінавачанага. Максімальны тэрмін, які пагражае абвінавачанаму — да 5 гадоў калоніі.
Прафесар Алесь Астроўскі выкладае на факультэце медыцынскай біялогіі і генетыкі Гродзенскага медуніверсітэта. Ён вядомы сваімі нацыянальна-апазіцыйнымі поглядамі.