Ураган Сэндзі "зачыняе" ЗША
Улады ЗША рыхтуюцца сустрэць ураган, які насоўваецца да ўсходняга ўзбярэжжа краіны. Ахвярамі ўрагану ў краінах Карыбскага басейна ўжо сталі каля 60 чалавек.
У некалькіх штатах Амерыкі абвешчаны рэжым надзвычайнай сітуацыі, зачыненыя школы і прыпыненая праца грамадскага транспарту. Паводле прагнозаў, стыхія абрынецца на раёны з насельніцтвам у некалькі мільёнаў чалавек, перадае ВВС.
Буйныя міжнародныя авіякампаніі, у тым ліку Air France, British Airways і Virgin Atlantic, адмянілі ў панядзелак трансатлантычныя палёты ў Нью-Ёрк, Балтымор, Ньюарк, Вашынгтон, Бостан і Філадэльфію. Чыгунка прыпыніла рух цягнікоў на паўночным усходзе краіны.
У нядзелю ў Нью-Ёрку пасля сямі вечара паводле мясцовага часу перасталі працаваць метро, аўтобусы і цягнікі. У панядзелак не працуюць усе школы. Акрамя таго, не працуе Нью-ёркская біржа. Амерыканцы на ўсходнім узбярэжжы масава скупляюць прадукты ў крамах.
Эксперты адзначаюць незвычайную шырыню ўрагану — да 835 км. Хуткасць ветру дасягае 120 км/гадз. 
Фота — ru.euronews.com і Reuters
