БАТЭ не змог перайграць “Лінфілд”
Барысачане з паўночнаірландскім клубам згулялі ўнічыю 1:1.
Сустрэча прайшла 13 ліпеня ў Белфасце. Гэта была першая сёлетняя гульня БАТЭ ў Лізе Чэмпіёнаў.
Гаспадары адкрылі лік ужо на 5-ай хвіліне. Вызначыўся нападаючы гаспадароў Дэрыл Фордайс. Праз паўгадзіны барысаўскі бразілец Рэнан Брэсан з пенальці аднавіў раўнавагу. У другім тайме галоў не было.
Сустрэча ў адказ пройдзе праз тыдзень у Барысаве. Нягледзячы на не зусім прыемны для БАТЭ вынік, шанцы на выхад у наступны этап у барысаўчан неблагія.
