"Аперацыю "Арго" ўсё ж пакажуць у Мінску
Продаж квіткоў на аскараносны фільм пачынаецца 27 лютага.
Сусветная прэм'ера карціны Бэна Афлека прайшла ўвосень. Але тады "Кінавідэапракат" не стаў купляць стужку.
Як паведаміў дырэктар прадпрыемства Васіль Коктыш "Комсомольской правде", "Аперацыю "Арго" пакажуць з 14 па 20 сакавіка ў кінатэатры "Беларусь". Калі ажыятаж будзе вялікім, то паказ фільма працягнецца. Раней у каментары Еўрарадыё Коктыш выказваў меркаванне, што фільм пакажуць у кінатэатры "Ракета".
Дарэчы, фільм "Аперацыя "Арго" яшчэ да "Оскара" сабраў амаль усе галоўныя кінаўзнагароды года. Афлека ўзнагародзіла Гільдыя прадзюсараў і Асацыяцыя тэлекрытыкаў ЗША і Канады. Брытанскія акадэмікі ўручылі прэмію BAFTA таксама Афлеку — і як лепшаму рэжысёру, і за лепшы фільм. Рэжысёр атрымаў "Залаты глобус" у намінацыях "Лепшы рэжысёр" і "Лепшы драматычны фільм". У карціны ёсць таксама прэмія ў галоўнай намінацыі Гільдыі рэжысёраў ЗША.
Фота — ria.ru