Led Zeppelin загаварылі загадкамі
І выклалі ў Сеціва дзіўныя карцінкі.
Led Zeppelin намякнулі на новы альбом. На сваёй старонцы ў Фэйсбук музыкі апублікавалі загадкавую выяву — белы надпіс “Five” на чорным фоне. Цікава, што такі ж шрыфт выкарыстоўваўся на вокладцы альбома “цэпелінаў” “Houses Of The Holy” 1973 года. Таму ў аматараў творчасці гурта ўзнікла падазрэнне, што вось-вось Led Zeppelin выдадуць раней анансаваны DVD канцэрта 2007 года на арэне O2. Да таго ж, мэнэджар Джымі Пэйджа Пітэр Мэнш падліў алею ў агонь, напісаўшы ў Твітары, што “ўсё амаль гатова”. А ў нядзелю на Фэйсбуку з’явіўся чарговы запіс ад Led Zeppelin. Гэтым разам слова “Four” напісана іншым шрыфтам. Падобна на адваротны адлік. Магчыма, цягам месяца нас чакае добрая навіна ад легендарнага гурта.