Чаму беларускія памідоры даражэй за турэцкія і іспанскія?

У інтэрнэце зноў пачалі абмяркоўваць адвечную тэму, чаму беларуская гародніна каштуе даражэй за імпартную. Еўрарадыё даведалася, чаму памідоры, прывезеныя з-за мяжы, каштуюць менш за беларускія.

Сёння на Камароўскім рынку можна купіць памідоры на любы густ — з Турцыі, Іспаніі, Італіі, Узбекістана… Кошты вар'іруюцца ад 6 да 50 тысяч. Прадаўцы запэўніваць, што бяруць усе, нават па 50 тысяч. І наогул, галоўнае не цана, а якасць.



Прадавачка: "Цэны такія, як і паўсюль. Галоўнае якасць захаваць, а кошты ж ёсць розныя, можна пакласці шырспажыў — і цана будзе ніжэй".

Але пакупнікі скардзяцца, што ўзімку купляць памідоры дорага.

Пакупніца: "Іх хіба толькі дзеля прыгажосці купляюць, таму што дорага".

Самыя танныя памідоры — турэцкія. Іх на Камароўцы хоць адбаўляй, каштуюць яны па 7 тысяч за кілаграм…



А вось з беларускімі памідорамі не ўсё так гладка. Калі мы казалі, што хочам набыць менавіта айчынныя таматы, на нас дзіўна глядзелі — маўляў, якія памідоры зімой:

"Памідора беларускага ўвогуле няма, па ўсёй Беларусі! Гэта, можа, імпартныя бяруць, а пішуць, што беларускія. Не працуем мы з беларускімі, бо іх і няма нідзе".

Тым часам у крамах беларускія памідоры ёсць. Каштуюць, праўда, даражэй за турэцкія і іспанскія — 11770 рублёў за кілаграм.

Зімой вырошчваюць памідоры на Мінскай фабрыцы гародніны.

"У нас лістапад, снежань, студзень ідуць памідоры. Мы пабудавалі новую цяпліцу, якая дазваляе нам вырабляць памідоры ў зімовы перыяд. Гэта наш першы досвед", — расказаў Еўрарадыё галоўны эканаміст фабрыкі.

Калі вы хочаце танных памідораў, трэба чакаць лета — нашыя тэхналогіі не дазваляюць вырабляць недарагія таматы, кажа эканаміст.

Які сэнс у такім разе вырошчваць свае памідоры, калі можна купляць танныя турэцкія? У інтэрнэце з'яўляліся жартаўлівыя каментары кшталту: "Дзе рэпартажы пра жахлівыя атручэнні імпартнымі памідорамі? Дзе перадачы пра карыснасць зялёных таматаў?"

Галоўны эканаміст фабрыкі гародніны на гэтую тэму не жартуе. Кажа, калі вам не важна вашае здароўе — можна купляць і імпартныя:

"У нас свая акрэдытаваная лабараторыя, у нас вельмі строга вытрымліваюцца ўсе тэхналогіі, выкарыстоўваюцца толькі дазволеныя прэпараты, толькі біялагічныя сродкі абароны — а яны нятанныя.

У нас сёння самы чысты тамат, самы чысты агурок, самая чыстая прадукцыя. Што з Турцыі прыязджае… вы самі разумееце. Мы ў краму адгружаем чыстую, прыстойную, як належыць, прадукцыю".

На скаргі пра тое, што памідоры жаўтаватыя і цвёрдыя, кажа, што так трэба паводле стандарту:

"Чыста чырвоны тамат — ён расціскаецца, ён нават згодна з тэхналогіяй збору не павінен быць мяккім. Калі мы іх адгружаем, яны маюць той выгляд, які неабходны паводле стандарту".


Фота: http://photo.bymedia.net