18-гадовая францужанка перамагла ВІЧ без лекаў (відэа)
Яна выйшла на шматгадовую рэмісію і адчувае сябе добра.
У Францыі зафіксавалі выпадак доўгатэрміновай рэмісіі ў пацыенткі, якая мае прыроджаны ВІЧ. Як паведаміла агенцтва Франс Прэс, 18-гадовая дзяўчына цягам апошніх 12 год не прымала лекаў, але тым не менш добра сябе адчувае і яе хвароба перастала развівацца.
Медыкі, якія назіралі за пацыенткай пры гэтым лічаць, што назваць яе цалкам вылекаванай нельга. Адзначаецца, што дзяўчына атрымала вірус імунадэфіцыту яшчэ ва ўлонні маці.
Выпадак з такой доўгатэрміновай рэмісіяй стаў сапраўднай сенсацыяй на канферэнцыі Міжнароднага таварыства барацьбы са СНІДам у Ванкуверы. Гэтая гісторыя хваробы абнадзейвае лекараў: цалкам магчыма, што арганізмы іншых пацыентаў змогуць самастойна змагацца з вірусам нават пасля спынення тэрапіі. Вывучэнне выпадку з 18-францужанкай дапаможа таксама стварыць больш дасканалую вакцыну для барацьбы са СНІДам.
Паводле звестак ААН, зробленыя цягам апошніх 15 гадоў захады па барацьбе са СНІДам прывялі да зніжэння колькасці хворых у свеце на 35% і смяротнасці — на 41%, перадае Euronews.
Фота: positime.ru