Што рабіць, калі беларус памірае ў Літве? Гайд

26/03/2024 - 15:20

Што рабіць, калі чалавек памірае ў Літве?

Што рабіць, калі чалавек памірае ў Літве? / LRT

Смерць блізкага чалавека — гэта не толькі вялікае гора для яго сям'і, але і велізарная бюракратычная валалакіта, асабліва калі гэта здараецца за мяжой. Еўрарадыё ўжо пісала пра тое, што рабіць і куды звяртацца, калі такое няшчасце здарылася з беларусам у Польшчы. Сёння мы раскажам, як дзейнічаць у выпадку смерці чалавека ў Літве.

Што рабіць у першую чаргу?

Калі грамадзянін Беларусі памёр у Літве, перш за ўсё трэба выклікаць паліцыю. Паліцэйскія пасля прыбыцця паведамляюць пра здарэнне ў консульскі аддзел пасольства Беларусі ў Літве.

Акрамя гэтага, трэба выклікаць лекара. У Літве гэта можна зрабіць па адзіным нумары экстранай дапамогі 112. Медыцынская брыгада фіксуе факт смерці, а цела адпраўляюць у морг.

Калі паліцыя западозрыла гвалтоўную смерць, то праводзіцца ўскрыццё. Калі смерць наступіла ў бальніцы, то яе павінен канстатаваць адказны за лячэнне лекар.

У выпадку смерці дома сваякі павінны самі звязацца з пахавальнай кампаніяй з нагоды вывазу і захоўвання цела. Пасля гэтага выдаецца медыцынскае заключэнне пра смерць адказным за лячэнне лекарам ці судова-медыцынскім экспертам.

Пахаванне ў Літве

Смерць у Літве рэгіструецца ў тэрмін да 5 дзён з моманту смерці. Рэгістрацыя праводзіцца ў ЗАГСе па месцы смерці. Пахаванне магчымае толькі пасля афіцыйнай рэгістрацыі смерці.

Каб яе аформіць, трэба падаць медыцынскае пасведчанне аб смерці з лякарні. Акрамя таго, для рэгістрацыі смерці ў ЗАГСе спатрэбіцца медыцынская карта памерлага, пасведчанне аб нараджэнні і пасведчанне аб шлюбе, калі яно ёсць.

Калі вырашылі пахаваць памерлага на тэрыторыі Літвы, тады неабходна атрымаць дазвол ад мясцовага самакіравання.

Паводле слоў супрацоўнікаў літоўскіх рытуальных кампаній, кошт пахавання ў Літве складае ад 1000 еўраў. У яго ўваходзяць падрыхтоўка нябожчыка, труны, часовы памятны знак, размяшчэнне труны з целам для развітання ў зале, катафалк і капанне магілы. Усе дадатковыя выдаткі таксама аплачваюцца сваякамі.

Акрамя гэтага, замежнікі, якія пастаянна пражываюць на тэрыторыі Літвы, а таксама асобы, якія маюць статус уцекача, могуць атрымаць дапамогу на пахаванне ў памеры 8 базавых сацыяльных выплат. Па звестках на 2023 год гэта 392 еўра. Для гэтага трэба звярнуцца ў адміністрацыю мясцовага самакіравання па месцы жыхарства нябожчыка не пазней за шэсць месяцаў са дня смерці шляхам падачы заяўкі і пасведчання аб смерці.

У выпадку, калі ў замежніка не было сваякоў, яго пахавае мясцовае самакіраванне за дзяржаўныя сродкі.

Перавоз у Беларусь

Транспартаваннем цела беларуса, памерлага ў Літве, займаюцца многія рытуальныя кампаніі. У тым ліку і беларускія. Яны заяўляюць, што дапамогуць з афармленнем усіх неабходных дакументаў і змогуць даставіць нябожчыка ў Беларусь.

Транспартаванне памерлых праводзіцца паводле парадкаў і законаў, якія дзейнічаюць у Літве. Для гэтага спатрэбіцца пасведчанне аб смерці, пашпарт памерлага, даведка аб адсутнасці старонніх укладанняў, пацверджанне аб герметычнасці цынкавай труны, даведка аб правядзенні бальзамавання, заключэнне СЭС, транспартныя накладныя, дакументы для перамяшчэння грузу праз мытную мяжу, дазвол амбасады Літвы.

Рэпатрыяцыя ў літоўскіх кампаніях абыйдзецца прыкладна ў 1500 Еўра.

Пры перавозе труны з Беларусі ў Літву дакументы афармляюцца на дзвюх мовах — літоўскай і беларускай/рускай. Пераклад неабходна засведчыць ў натарыуса.