На кожную копію слуцкага пояса пойдзе 50 грамаў золата

Як і паведамляла раней Еўрарадыё, у Беларусі не знайшлося абсталявання, якое б магло вырабіць копію слуцкага пояса. Замовілі ў Германіі, а на фабрыцы "Слуцкія паясы" ўжо шукаюць варыянты ўпакоўкі для арыгінальных і сувенірных паясоў.

"Зараз ідзе рэканструкцыя і закупка абсталявання", — вельмі сціпла распавядаюць на фабрыцы. І адказваюць, што першыя могуць з'явіцца ўжо ў чэрвені.

Кіраўнік Музея старажытнай гісторыі Барыс Лазука тлумачыць, што на фабрыцы будуць вырабляць два віды паясоў:

"Ёсць паняцце аналага-копіі і сувеніра. Аналаг — гэта тое, што максімальна набліжана да арыгінала. Натуральна, што кошт яго будзе вялікі. Ёсць розныя прапановы па сыравіне, як ніткі будуць абкручвацца — золатам ці срэбрам. На такі пояс можа пайсці 50 грамаў золата, адсюль можна і кошт прыкінуць. Але гэта будуць адзінкавыя вырабы".

Прыкладна такі пояс будзе каштаваць каля 1-2 тысяч долараў у залежнасці ад колькасці золата ці срэбра. Што праўда, ніхто кошт пакуль не лічыў.

Плануецца, што фабрыка будзе вырабляць і сувенірныя паясы, якія будуць са штучнага шоўку, і не сапраўднага золата. Але Барыс Лазука запэўнівае Еўрарадыё, што абывацель іх не адрозніць ад дарагіх копій.

У Слуцку сёння выпускаюць паясы, падобныя да тых самых слуцкіх паясоў толькі малюнкам і памерамі. І каштуюць яны 4 мільёны рублёў.

"Наш пояс робіцца ўручную два месяцы. Таму ён каштуе 4 мільёны. Калі гэта шоўк, то, можа, будзе каштаваць каля 5 мільёнаў, с золатам — у разы даражэй".

Нават упакоўка для будучых аналагаў і копій слуцкіх паясоў ацэнена ў 800 мільёнаў рублёў на ўсе вырабы.

Упакоўка ж павінна быць таксама творам мастацтва, адзначаюць на фабрыцы. Назва вытворцы павінна быць на беларускай і англійскай мовах, выявы пояса і Слуцка, таварны знак "Слуцкія паясы". Даўжыня пояса будзе ад 200 да 480 сантыметраў, шырыня ад 20 да 40. Для параўнання: даўжыня пояса ў музеі Багдановіча — 360, а шырыня — 30 сантыметраў.

Будынак фабрыкі аздобяць у некалькі разоў павялічанай каляровай выявай слуцкага пояса — аднаго з пяці, якія сёння ёсць у Беларусі.

Апошнія навіны

Галоўнае

Выбар рэдакцыі