Суд над Ігарам Логвінавым працягнецца 9 студзеня
Уладальнік кнігарні не прызнаў сваёй віны і падаў шэраг хадайніцтваў.
У Эканамічным судзе Мінска пачаўся суд над Ігарам Логвінавым — уладальнікам кнігарні "логвінаЎ". Прадпрымальніка вінавацяць у продажы кніг без ліцэнзіі Мінінфармацыі.
Як перадае журналіст Еўрарадыё Алесь Пілецкі, на суд не пусцілі амаль нікога з некалькіх дзясяткаў чалавек, якія прыйшлі падтрымаць Логвінава. Афіцыйная прычына — адсутнасць адпаведнай залы. На суд змаглі трапіць толькі карэспандэнт Еўрарадыё, журналістка Радыё "Свабода", праваабаронца Алена Танкачова і жонка Ігара Логвінава.
На судзе Ігар Логвінаў не прызнаў сваёй віны і падаў шэраг хадайніцтваў. У сувязі з гэтым судовы працэс працягнецца ў пятніцу, 9 студзеня, у 14.30.
