Замест дыскваліфікаванага беларуса на Гульні едзе паляк. Яго рыхтаваў наш трэнер

Замест дыскваліфікаванага беларуса на Гульні едзе паляк. Яго рыхтаваў наш трэнер

Яшчэ нядаўна польскі вясляр-байдарачнік Рафал Расольскі быў перакананы, што не выступіць на Алімпіядзе-2016. Але яго напаткала неверагодная спартовая ўдача.

Міжнародная федэрацыя каноэ (ICF) зняла беларускую мужчынскую зборную байдарачнікаў і канаістаў з Алімпіяды, нібыта за мельдоній. Хоць рашэнне было прынятае, доказы прэсе дагэтуль не прадстаўленыя. На сем вакантных месцаў, якія займалі беларусы, запрасілі іншых весляроў. Паляк Рафал Расольскі трапіў у іх лік. Ён выступіць на дыстанцыі 1000 метраў. Мяркуючы па ўсім, заменіць нашага байдарачніка Алега Юрэню.

Іронія лёсу ў тым, што да Алімпіяды Расольскага рыхтаваў вядомы беларускі спецыяліст.

“Я быў пад апекай трэнера Уладзіміра Парфяновіча ў 2015 годзе, ён рыхтаваў мяне да чэмпіянату свету. І сёлета ён трэніраваў мяне аж да трэцяга Кубка свету ў Мантэмор-у-Вэлью (спаборніцтвы праходзілі сёлета на пачатку чэрвеня). Пазней Польская федэрацыя каноэ скасавала з ім кантракт, бо мы не заваявалі алімпійскую ліцэнзію”, — апавядае Расольскі Еўрарадыё.

Замест дыскваліфікаванага беларуса на Гульні едзе паляк. Яго рыхтаваў наш трэнер
Парфяновіч падчас супрацоўніцтва з польскай зборнай. Рафал Расольскі — другі злева. Яшчэ адзін польскі алімпіец, Павэл Качмарэк, — чацвёрты справа.

Уладзімір Парфяновіч: “У ЗША на допінгу злавілі 19 сваіх жа атлетаў. І ніхто не крычаў, што гэта палітыка”

 

Трохразовы алімпійскі чэмпіён Уладзімір Парфяновіч ужо ведае пра тое, што адну з беларускіх квотаў аддалі Расольскаму. Пра скандал з беларускай зборнай спецыяліст мала што ведае, але схіляецца да думкі, што нашу зборную дыскваліфікавалі не на роўным месцы.

Замест дыскваліфікаванага беларуса на Гульні едзе паляк. Яго рыхтаваў наш трэнер

“Калі яны кажуць, што маюць доказы, значыцца, маюць. І калі міжнародны спартыўны арбітраж адхіліў аргументы беларускага боку, то тут няма пра што казаць. Не бывае такога, каб нехта кідаўся ў бакі, маўляў мы такія чыстыя, а іх проста так дыскваліфікоўваюць. У справе можа быць шмат тонкасцяў. Напрыклад, ці быў прэпарат, які знайшлі ў трэнера, правільна задэклараваны? Усіх гэтых тонкасцяў я не ведаю”, — разважае Парфяновіч.

Еўрарадыё: Мельдоній некаторыя спецыялісты называюць вітамінамі для ўзнаўлення. Ці сапраўды ўжыванне гэтага рэчыва давала спартсменам перавагу перад іншымі?

Уладзімір Парфяновіч: Мельдоній дае магчымасць пераносіць большыя нагрузкі. Атлет можа зрабіць больш працы. А ўсё, што дае перавагу, я лічу, — гэта і ёсць допінг. Нават тое, што яшчэ не забаранілі. Мельдоній быў танны, даступны.

Еўрарадыё: Вам не падаецца, што ў выпадку з беларускай камандай ролю згуляла палітыка, што да нас ставяцца неаб’ектыўна?

Уладзімір Парфяновіч: Помніце, як у ЗША на допінгу злавілі 19 атлетаў (гісторыя 2003 года, — Еўрарадыё)? Амерыканцы ўзялі аналізы ўнутры краіны і без Міжнароднага алімпійскага камітэта і WADA адхілілі сваіх жа атлетаў. І ніхто не крычаў, што гэта палітыка. Таму што чыстымі трэба быць! Ніякага неаб’ектыўнага стаўлення да Беларусі няма. Дурасць! Усё аб’ектыўна! Не трэба чытаць савецкіх газет.

Еўрарадыё: Няўжо ў зборнай Расіі, калі вы яе ўзначальвалі, не прымалі мельдоній?

Уладзімір Парфяновіч: Я ніколі не хадзіў у пакой да доктара. Але заўсёды казаў, што такога быць не павінна. Спартсмен нічога не павінен ужываць. Гадоў дваццаць таму я прапанаваў, каб допінг у нас быў забаронены крымінальна. Мяне ніхто не падтрымаў.

Трэнер весляроў, у якога знайшлі мельдоній: З-за сэрца не раз выклікаў "хуткую"

Шанцы на Алімпіяду страчаныя, але зборная працягвае трэніравацца

 

Усе юрыдычныя магчымасці, каб вярнуць беларускую зборную на Алімпіяду, вычарпаныя. Гэтую інфармацыю Еўрарадыё пацвердзілі ў НАК Беларусі.

Але трэнерскі штаб нашых байдарачнікаў і канаістаў, падобна на тое, не хоча ў гэта верыць. Каманда накіравалася на чарговыя зборы.

“Я і іншыя шэсць весляроў выехалі ў Брэст. Нам сказалі трэніравацца да апошняга”, — паведамляе Еўрарадыё байдарачнік Арцём Козыр.

Хто з беларускіх алімпійцаў відавочна прэтэндуе на п'едэстал

“Надзея памірае апошняй. Калі ўпэўнены, што ні ў чым не вінаваты”, — тлумачыць матывы такіх трэніровачных збораў Аляксей Багдановіч.

“Усе жывуць з надзеяй”, — дадае яго брат Аляксандр, які меў быць сцяганосцам усёй алімпійскай беларускай зборнай.

Мужчынская зборная па веславанні плануе быць у Брэсце да 6 жніўня. А потым вылецець у Рыо. Толькі ўдзел каманды ў Алімпіядзе, падобна на тое, будзе куды большым цудам, чым калі б нават кожны з нашых весляроў выйграў па залатым медалі.

Аляксандр Багдановіч: Ніколі ў жыцці не прымаў допінг, я абсалютна чысты

Фота з асабістага архіву Рафала Расольскага і з сайта paddlesports.ru

Апошнія навіны

Галоўнае

Выбар рэдакцыі