Як зарабляюць сотні тысяч долараў на дагаворным футбольным матчы ў Беларусі

Па справе аб дагаворных матчах у беларускім футболе ў якасці падазраваных прыцягнутыя некалькі футбалістаў і трэнер клуба першай лігі. Пад варту ніхто пакуль не ўзяты.

У МУС паведамляюць толькі некаторыя дэталі. З адной стаўкі зламыснікі атрымалі даход у сотні тысяч еўра. Аднак нават мацёрыя наведвальнікі букмекерскіх кантор засумняваліся, ці стане салідны букмекер прымаць такія сумнеўныя стаўкі і з-за гэтага рызыкаваць?

2 ліпеня 2016 года. У перамогу ФК “Ашмяны” ніхто не верыць. Яны — аўтсайдэры першай лігі. “Луч” з Мінска — адны з фаварытаў (каманда ідзе на 4 месцы).

Па сайце wettportal.com, дзе можна маніторыць каэфіцыенты розных букмекераў на канкрэтную гульню, бачна: каэфіцыент на перамогу “Ашмянаў” дасягае 10 (з 30 тысяч пастаўленых еўра можна атрымаць 300 тысяч). Каэфіцыент на нічыю — 5,4 (з 30 тысяч атрымліваеш 162 тысячы).

"Ашмяны" да 62 хвіліны матчу ўпэўнена перамагаюць. Гэта самы зручны момант для тых, хто загадзя ведае вынік…

На трыбунах у Ашмянах прысутнічае адзін з найважнейшых фігурантаў крымінальнай справы —украінскі баскетбаліст Яраслаў Лемік. Год таму на радзіме яго пажыццёва дыскваліфікавалі якраз за спробу арганізацыі дагаворніка.

Прайграючы 3:1, “Луч” нечакана забівае два галы і зраўноўвае лік. І вось, тыя “шчасліўчыкі”, якія паставілі на нічыю, атрымліваюць каласальны прыбытак.

Даказаць праўдзівасць такога сцэнарыя няпроста. Неабходна, каб загаварылі непасрэдныя ўдзельнікі дагаворнага матчу.

Якіх футбалістаў лёгка падкупіць для “зліву” матча?

Пасля гульні “Луч”-“Ашмяны” спецназаўцы падрэзалі легкавік з футбалістамі “Ашмянаў”, завезлі іх у ГУБАЗіК, апыталі і адпусцілі. Пасля гэтых падзеяў у футбаліста Сяргея Булынёнка аказалася зламанай скула і костка пад вокам. Справа дайшла да аперацыі.

Начальнік 2-га аддзела 2-га ўпраўлення ГУБАЗіКу Аляксей Барушка у тэлепраграме “Зона Х” паведаміў, што “ў ГУБАЗіК прыбылі два чалавекі, якія ўдзельнічалі ў дагаворных матчах, якія патлумачылі ўсе абставіны і напісалі яўкі з павіннай”.

Якія менавіта футбалісты загаварылі, пакуль незразумела.

Цікавімся ў Аляксея Ткачука, колькі могуць плаціць футбалістам беларускай першай лігі за забеспячэнне “правільнага” выніку.

“Мы рабілі ананімную гутарку з арганізатарамі дагаворных гульняў. Яны расказвалі, што спачатку выходзяць на сувязь з гульцамі асновы. Пры гэтым, дастаткова дамовіцца толькі з футбалістамі каманды, якая павінна зліць матч. Найчасцей гэта гульцы, якія самі ставяць на матчы і трапляюць у пазыкі. Нярэдка ахвярамі робяцца футбалісты клуба, дзе ёсць праблема з выплатай заробкаў. Бывае, выходзяць на лідара каманды, і ён дамаўляецца з таварышамі. Сустрэчы з гульцамі арганізоўваюцца такім чынам, каб гэта не было заўважана і зафіксавана. Дзіўныя стаўкі самі па сабе не з’яўляюцца доказам. Адзіная небяспека для гульца, што на сустрэчы з арганізатарам адбудзецца "маскі-шоў" і яго зловяць за руку.

Еўрарадыё: Якія ганарары маюць нячыстыя на руку футбалісты?

Аляксей Ткачук: Многае залежыць ад рынку і канкрэтнай каманды. Мяркую, калі гэта першая ліга чэмпіянату Беларусі, то гэта максімум некалькі тысяч долараў кожнаму гульцу, які замяшаныя ў дагаворным матчы.

Галоўнае ўпраўленне па барацьбе з арганізаванай злачыннасцю і карупцыяй распаўсюдзіла відэа, на якім прадстаўніку адной з каманд нешта даюць у рукі. Паводле папярэдняй інфармацыі, такім чынам перадалі каля чатырох тысяч долараў. Так відэа пракаментавалі ў ГУБАЗіКу для праграмы “Зона Х”.

Нагадаем, што на пачатку ліпеня ў Беларусі адбыўся шэраг затрыманняў людзей, якіх падазраюць у арганізацыі дагаворных матчаў. У поле зроку праваахоўнікаў трапілі як мінімум дзве гульні з удзелам каманды “Луч”. 25 чэрвеня сталічная каманда сустрэлася з гомельскім ГЧТ, 2 ліпеня — з “Ашмянамі”.