У Варшаве праходзіць выстава карцін мастака Алеся Пушкіна

У Варшаве на пляцоўцы Беларускай прасторы "Робім Разам" (pl. Konstytucji, 6) праходзіць выстава карцін мастака Алеся Пушкіна, прымеркаваная да Дня Волі. У ліпені 2023-га палітвязень загінуў у зняволенні ў Беларусі.

Карціны, якія дэмаструецца (а гэта паўтара дзясятка твораў), паходзяць з двух прыватных калекцый і аднаго ўніверсітэта. Іх уладальнікі прадаставілі іх на тры тыдні задарма. На карцінах бачым пейзажы і партрэты, у тым ліку гістарычных дзеячоў.

Алесь Пушкін знаходзіўся за кратамі з сакавіка 2021 года. 30 сакавіка 2022-га яго асудзілі на 5 гадоў калоніі строгага рэжыму. Падставай для абвінавачанняў сталі карціны з цыклу "Беларускі супраціў" і перфоманс, які ён правёў у Кіеве.