Стала вядома, калі ў Беларусі падаражэе праезд у грамадскім транспарце
У красавіку чакаецца падаражэнне на 11-12% у Мінску і на 14-16% — у абласцях.
У Мінску зноў падаражэе праезд у грамадскім транспарце. Пра гэта паведамляе газета "Звязда" са спасылкай на намесніка міністра эканомікі Дзмітрыя Крутога. Паводле яго слоў, у красавіку праезд у сталіцы падаражэе на 11-12%. Нагадаем, папярэдняе падаражанне адбылося 13 снежня мінулага года. Кошт адной паездкі вырас з 4000 да 4500 рублёў.
Дарэчы, у 2015 годзе ў Мінску збіраюцца ўвесці дыферэнцыяваныя тарыфы на праезд у грамадскім транспарце. Магчыма, гэта здарыцца ў першым паўгоддзі.
Намеснік міністра эканомікі таксама паведаміў, што ў красавіку на 14-16% падаражэе праезд у грамадскім транспарце ў абласцях. Для аўтамабільнага прыгараднага транспарту падаражанне складзе 10-15%.
У чыгуначных рэгіянальных і міжрэгіянальных перавозках у Беларусі тарыфы плануецца падняць на 70%.
У Беларусі праезд у электрычках падаражэе на 60-70%