Litesound: Пераглядзелі свой выступ у паўфінале. Ну, нічога, усё ідэальна!

Чарговы беларускі гурт “абламаўся” на “Еўрабачанні”. Хлопцы гуляюць па Баку, бо зваротныя квіткі яны набылі на 27 траўня, пасля фіналу. Еўрарадыё размаўляе пра паражэнне з дырэктарам гурта, бацькам франтмэнаў Litesound Юрыем Каракіным.


Найперш пытаюся, як прайшоў вечар пасля паўфіналу:


Юрый Каракін: “Вясёлым вечар не быў. Усе былі ў шоку… Першыя паўгадзіны ўвогуле з трансу не маглі выйсці, настолькі нечаканы вынік. Пасля выступу і Дзіма, і ўсе астатнія хлопцы ўвогуле не хваляваліся, сядзелі ў зале. А падчас абвяшчэння вынікаў Дзіма нават не зразумеў, што адбылося. Уночы ў гатэлі да Litesound падышоў шведскі каментатар, мужчына гадоў пад сорак і пачаў віншаваць: “Які ў вас цудоўны нумар, як нам спадабалася!” І раптам бачыць, што хлопцы на яго здзіўлена вельмі глядзяць. Ён пытаецца: “Што такое?” А мы яму ў адказ: “Дык мы ж не прайшлі!” Яго гэта вельмі засмуціла”.


Першае, што беларускія музыкі зрабілі пасля таго, як вярнуліся ў гатэль ― пераглядзелі свой выступ і засталіся задаволеныя. 


Юрый Каракін: “Мы аддзячылі адно аднаго за добра зробленую працу. Зразумела, што віна не наша была…. Ну і ўсё, а пасля гэтага прыйшлі галандцы, запрасілі нас на сваю вечарынку. Яны радасна святкавалі свой непраход. Мы песні з імі спявалі паўночы, і ў хлопцаў настрой крыху выправіўся”.

 
Па словах Юрыя Каракіна, выступ Litesound прайшоў... ідэальна.


Юрый Каракін: “Мы адразу ж у нумары ўсё пераглядзелі. Ну, нічога, усё ідэальна! Ніякіх хібаў ніхто не заўважыў. А мы да ўсяго ставіліся вельмі патрабавальна! Была і занепакоенасць у нас: на рэпетыцыі некалькі разоў Якапа [Якапа Маса, удзельнік Litesound. ― Еўрарадыё] зрываўся з платформы. Былі на рэпетыцыі праблемы з вакалам, некуды крыху з’язджалі… Але тут ― тут усё было ідэальна!”


А вось персанал арэны, якая прымае “Еўрабачанне 2012”, не здолеў паразумецца з фанаграмай, якую прынеслі Litesound.


Юрый Каракін: “Калі быў выступ перад журы, быў чыста тэхнічны збой, у якім вінаваты персанал Crystal Palace. Святло было не такое, як мела быць, а дакладней ― музыка і святло не ўвайшлі ў сінхранізацыю. Рэжысёр спыніў нумар. Нешта паправілі, і запусцілі ўсё нанова. Я не думаю, што гэты збой быў вельмі істотны. Хіба што, па хлопцах псіхалагічна ўдарыў, яны і так не вельмі добра трымаюцца, калі стаяць на сцэне перад пустой залай…”

 
У часе паўфінала “Еўрабачання” нумар Litesound чамусьці “прыглушылі” ― гэта было адчувальна не толькі тэлегледачам, але і тым, хто сядзеў у зале:


Юрый Каракін: “Калі выступалі канкурсанты да і пасля Litesound, было вельмі гучна, акустычны ціск ― амаль да непрыемных адчуванняў у вушах. А вось калі мы выступалі ― сапраўды адчувалася, што ўзровень гуку стаў ніжэйшы, і “We are the heroes” прагучала цішэй... Суб’ектыўна, гэта было добра чуваць. А любая выпадковасць тут ― добра падрыхтаваная, таму незразумела, што гэта такое”.

 
Litesound вернецца ў Беларусь толькі 27 траўня. Задоўга да “Еўрабачання” хлопцы вырашылі, што паляцяць з Баку толькі пасля фіналу. Нават адмовіліся ад ранішняга рэйса “Белавіі”, на які маглі б не паспець у выніку перамогі. З-за гэтага давядзецца ляцець з перасадкай праз Маскву.

Фота: ctv.by

Глядзець фота і відэа выступу Litesound

Апошнія навіны

Галоўнае

Выбар рэдакцыі