Litesound не патрапіў у фінал "Еўрабачання" (фота, + відэа фіналістаў)

Прадстаўнікі Беларусі зноў праляцелі міма фіналу Еўрабачання. Гурт Litesound, які 6 разоў прабіваўся на еўрапейскі песенны конкурс, не здолеў трапіць у дзясятку лепшых у другім паўфінале, які адбыўся 25 траўня ў Баку.

Глядзі таксама: Відэа пераможцаў першага паўфінала, дзе былі і расійскія “Буранаўскія бабулі”, якія праспявалі фальшыва, але прайшлі далей.

Браты Каракіны выступалі з песняй "We are the heroes". Замест прывычнай для сябе “нікельбэкаўскай” аранжыроўкі яны выкарысталі прымітыўную мінусоўку “тыц-тыц-тыц” а-ля расійскай эстрады пачатку 1990-х. З такім гучаннем хлопцы з гітарамі на заднім плане выглядалі карыкатурна і не натуральна. Невядома, гэта паўплывала на выбар журы і гледачоў ці не, але Беларусь зноў не здолела прабіцца ў фінал.

“Я не хачу нікога цяпер вінаваціць, – распавёў “Камсамольскай праўдзе” вакаліст Litesound Дзіма Каракін. – Мне проста чыста па-чалавечы крыўдна, што “Еўрабачанне” ператвараецца сёння ў нейкае “Балканабачанне”. Усё было відавочна. Мы атрымалі велізарнае задавальненне на сцэне. Думаю, што гледачы таксама. Не нерваваліся… Маё меркаванне, што Беларусі не варта больш удзельнічаць у "Еўрабачанні". Або варта разабрацца, якім чынам трапляюць у фінал іншыя краіны і зрабіць дакладныя высновы. Ці зусім не ўдзельнічаць, як гэта зрабілі ў Чэхіі і Польшчы”.

У фінал патрапілі прадстаўнікі Літвы, Босніі і Герцагавіны, Сербіі, Украіны, Швецыі, Македоніі, Нарвегіі, Эстоніі, Мальты і Турцыі. Яны далучацца да дзясяткі фіналістаў, якія вызначыліся 23 траўня, а таксама шасцёркі краін, якія трапляюць у фінал аўтаматычна (Англія, Германія, Францыя, Іспанія, Італія і гаспадары конкурсу Азербайджан). Фінал "Еўрабачання" пройдзе ў суботу, 26 траўня.

Сербія. Жэлька Ёксімавіч. Nije ljubav stvar

Мальта. Курт Калея. This is the night

Македонія. Каліопі. Cerno i belo

Боснія і Герцагавіна. MayaSar. Korake Ti Znam

Украіна. Гайтана. Be my Guest

Эстонія. Ота Леплэнд. Kuula

Швецыя. Лорын. Euphoria

Турцыя. Джан Банома. Love me Back

Нарвегія. Туджы. Stay

Літва. Доні Монтэл. Love is Blind

Нагадаем, Беларусь удзельнічае ў Еўрабачанні з 2004 года. Першымі нашу краіну прадставіў фолк-дуэт “Аляксандра і Канстанцін”, які заняў 19 месца.

2005 Анжаліка Агурбаш

2006 Паліна Смолава (самы горшы вынік – 22 месца ў паўфінале)

2007 Дзмітрый Калдун (6-е месца ў фінале, самы лепшы вынік)

2008 Руслан Аляхно

2009 Пётр Ялфімаў

2010 “3+2” (24 месца ў фінале)

2011 Анастасія Віннікава

2012 Litesound

Фота — ctv.by, daylife.com