Лукашэнка і Пуцін у Казахстане могуць абмеркаваць вайсковую базу ў Беларусі
![Лукашэнка і Пуцін у Казахстане могуць абмеркаваць вайсковую базу ў Беларусі](/sites/default/files/styles/gallery_main/public/2023-08/lukapu-1410.jpg.webp?itok=2Sn-f9UK)
15-16 кастрычніка Аляксандр Лукашэнка наведае з працоўным візітам Казахстан. Як паведамляе прэс-служба беларускага кіраўніка, ён прыме ўдзел у пасяджэннях Савета кіраўнікоў дзяржаў-удзельніц Садружнасці Незалежных Дзяржаў і Вышэйшага Еўразійскага эканамічнага савета.
На саміце СНД плануецца абмеркаваць 17 пытанняў. У прыватнасці, плануецца прыняць заявы ў сувязі з 70-годдзем стварэння ААН, 30-й гадавінай аварыі на Чарнобыльскай АЭС, аб барацьбе з міжнародным тэрарызмам. Таксама шэраг пытанняў прысвечаны далейшаму ўмацаванню ваеннага і памежнага супрацоўніцтва.
Не выключана, што кіраўнікі Беларусі і Расіі абмяркуюць стварэнне расійскай вайсковай базы на тэрыторыі нашай краіны. Перад выбарамі Лукашэнка публічна заяўляў, што гэтае пытанне яшчэ не вырашанае і ён такога рашэння не прымаў. Тым часам прэс-сакратар Уладзіміра Пуціна Дзмітрый Пяскоў 12 кастрычніка абверг словы Лукашэнкі і паведаміў, што адпаведныя перамовы адбыліся на ўзроўні кіраўнікоў дзяржаў.
Крэмль распавёў, як Лукашэнка і Пуцін правялі перамовы пра авіябазу
На Вышэйшым Еўразійскім эканамічным савеце плануецца абмеркаваць асноўныя напрамкі міжнароднай дзейнасці, эканамічнага развіцця ЕАЭС, падыходы да развіцця гандлёва-эканамічнага супрацоўніцтва з асноўнымі партнёрамі на сярэднетэрміновую перспектыву. Таксама будзе абмярковаўцца пачатак перамоваў з Ізраілем пра заключэнне пагаднення аб зоне свабоднага гандлю.
Фота: joinfo.ua