Ігар Шуневіч прызнаў, што міліцыянты "не заўжды кампетэнтныя"

Міністр унутраных спраў Ігар Шуневіч прызнаў, што міліцыянты не заўжды добра выконваюць свае абавязкі.

"Сапраўды, мы не заўсёды кампетэнтныя на ўзроўні першай інстанцыі, і на гэта ёсць шмат прычын, у тым ліку нейкая прафесійная негатовасць да рашэння вельмі складаных, часцяком застарэлых пытанняў", — адзначыў міністр пасля таго, як правёў у Мінску асабісты прыём грамадзянаў.

Ён дадаў, што асноўнай формай атрымання інфармацыі для праваахоўнікаў "заўсёды былі асабістыя прыёмы, кантакты з людзьмі". "Любая дапамога грамадзян вітаецца. Без прыцягнення грамадскасці (у прыватнасці, добраахвотных народных дружын) складана забяспечыць на належным узроўні правапарадак", — лічыць Ігар Шуневіч.

Сустракаюцца і выпадкі фармалізму ў працы. Ігар Шуневіч распавёў пра зварот адной з заяўніц, якую аштрафавалі за паркоўку на месцы для людзей з абмежаванымі магчымасцямі, а яе на машыне проста дажджом змыла спецыяльную налепку. "Супрацоўнікі праваахоўных органаў з пункту гледжання закона паступілі правільна, але фармальна. З такімі фактамі трэба змагацца", — лічыць міністр.

Нагадаем, за апошні год ведамства Ігара Шуневіча рэгулярна апынаецца ў цэнтры скандалаў. Супрацоўнікі ДАІ трапляліся п'янымі за рулём. У навагоднюю ноч міліцыянт з табельнай зброі параніў мінчука, суседзі якога скардзіліся на шум. А ў Крычаве міліцыянты паскардзіліся на свайго начальніка, пасля чаго іх звольнілі са службы.