Гандлярам-іпэшнікам далі палёгку: 1 сакавіка праверак і санкцыяў не будзе

Індывідуальным прадпрымальнікам, якія гандлююць легкапрамысловымі таварамі без патрэбных дакументаў на іх, далі яшчэ адну адтэрміноўку. 1 сакавіка іх паабяцалі не правяраць і не караць за невыкананне новых правілаў. Адпаведна, яны змогуць працаваць па старых правілах да ўвядзення новага ўказа. Пра гэта журналістам паведаміў намеснік міністра эканомікі Дзмітрый Круты, інфармуе БЕЛТА.

Паводле ўказа №222, які выйшаў у траўні мінулага года, з 1 сакавіка сёлета ў гандляроў-прадпрымальнікаў выбягаў тэрмін, у часе якога яны маглі распрадаць рэшткі адзення, абутку ды іншых лёгкапрамысловых тавараў, якія ўвезлі з краін Мытнага саюза без пацвярджальных дакументаў.

Як запэўніў намеснік міністра эканомікі, ад заўтрашняга дня для прадпрымальнікаў не будзе ніякіх санкцыяў — іх не будуць правяраць і штрафаваць за адсутнасць дакументаў на тавар. “Усе могуць працаваць у спакойнай абстаноўцы”, — сказаў Дзмітрый Круты.

З яго словаў, пазаўчора кіраўнік краіны даручыў неадкладна вырашыць гэту праблему і цяпер эксперты Мінэканомікі сумесна з прадстаўнікамі бізнес-саюзаў распрацоўваюць праект канчатковага нарматыўна-прававога акту, які павінен вырашыць гэтыя праблемы.

На "Жданах" са зніжкамі распрадаюць не толькі тавар, але і гандлёвыя кропкі

З 1 сакавіка некаторых ІП у Беларусі чакае штраф — да 9 млн рублёў

Ці праўда, што прадпрымальнікі масава адмаўляюцца ад працы на рынках