Беспарадкі ў Швецыі перакінуліся са Стакгольму на іншыя гарады
У ноч на суботу група моладзі ў горадзе Эрэбу (200 км ад сталіцы) закідала камянямі мясцовы пастарунак і спаліла не меней за пяць аўтамабіляў.
Як паведамляе ВВС са спасылкай на шведскае МУС, у цэнтры горада назіралі натоўп прыкладна са 150 агрэсіўна настроеных людзей, многія з якіх былі ў масках і трымалі каністры з гаручымі рэчывамі.
Паводле звестак паліцыі, машыны ў ноч на 25 траўня гарэлі ў 12 гарадах Швецыі.
Начныя беспарадкі ўспыхнулі ў мінулыя выходныя ў бедных кварталах Стакгольму — збольшага ў паўночна-заходнім раёне Хюсбю, дзе жывуць імігранты. Беспарадкі працягваюцца шэсць начэй запар.
Мяркуецца, што нагодай для іх стаў інцыдэнт, у часе якога паліцыянты каля тыдня таму застрэлілі мужчыну, які пагражаў ім мачэтэ.
Фота: EPA/ИТАР-ТАСС
