Беларусы трацяць на ежу 40% заробку, жыхары Люксембурга — толькі 8%

Белстат рэгулярна праводзіць маніторынг даходаў беларусаў, а таксама іх выдаткаў на ежу, нехарчовыя тавары ды алкаголь.

Глядзім статыстыку. У 2014 годзе беларусы каля 40% заробку аддавалі на ежу, 2,5% — на алкаголь, яшчэ каля 38% — на нехарчовыя тавары ды 20% на паслугі (гл. графік). Ужо чатыры гады запар доля выдаткаў амаль не змяняецца.

У Белстаце тлумачаць, што чым менш чалавек аддае на ежу, тым лепей ён жыве. Напрыклад, у Люксембургу на харчаванне людзі трацяць толькі 8% ад свайго даходу супраць 40% у Беларусі.

“Беларусы як елі, так і ядуць, але, да прыкладу, пачалі набываць больш танныя харчовыя прадукты, чым раней”, — заўважаюць статысты.

Акрамя гэтага, Белстат штогод праводзіць апытанне аб матэрыяльным становішчы хатніх гаспадарак — так статысты называюць сем’і або людзей, якія жывуць самастойна.

“У дадзеным выпадку ідзе гаворка пра тое, што даследуюцца ўсе хатнія гаспадаркі ў Беларусі, а іх каля 3,770 млн, то бок бяруць удзел і самыя багатыя людзі, і малазабяспечаныя сем’і”, — гавораць у Белстаце.

Людзям прапанавалі адказаць на пытанне, як яны ацэньваюць сваё матэрыяльнае становішча (падрабязныя дадзеныя прыведзеныя ў табліцы).

У выніку, у 2014 годзе амаль 70% беларусаў аднеслі сябе да сярэдняга класу. Іх колькасць у параўнанні з 2013 годам вырасла на 3,2%.

А вось тых, хто адчувае сябе багатым, у Беларусі цяпер зусім мала — 0,2%. У параўнанні з мінулым годам гэты паказчык таксама ўпаў на 1,6%.

“Гаворка ідзе пра тую катэгорыю, якая мае даход ад 30 мільёнаў на кожнага члена сям’і. Год таму гэты паказчык быў роўны 1,8%”, — кажуць у Белстаце і заўважаюць, што патлумачыць, якія крытэрыі адносяцца да характарыстыкі сярэдняга ці нізкага матэрыяльнага стану, яны не могуць. Апытанне, нагадаем, носіць суб’ектыўны характар.

Табліца 1. Структура спажывецкіх выдаткаў сем’яў, %

Табліца 2.Суб’ектыўнае меркаванне сямей аб іх матэрыяльным становішчы, %