Хто жыве бядней за ўсіх. Стала вядома, колькі плацяць беларусам

05/02/2024 - 16:57

Паглядзелі заробкі беларусаў / @rubanau_collage

З'явіліся ў агульным доступе звесткі Белстата аб медыянным заробку за лістапад 2023-га.

Еўрарадыё паглядзела, колькі атрымліваюць беларусы розных прафесій. Напрыклад, кожны пяты педагог жыве на суму менш за 700 рублёў.

Так, па афіцыйных дадзеных, больш за ўсіх у нашай краіне зарабляюць у горназдабыўной прамысловасці і ў сферы інфармацыі — 3781 і 3171 рубель адпаведна. Самы нізкі медыянны заробак налічылі работнікам творчай сферы (1000,9 рублёў), паштовай і кур'ерскай дзейнасці (1085,4 рублёў), а таксама адукацыі (1098 рублёў).

Інфармацыя і сувязь

Прадстаўнікі гэтай сферы традыцыйна ўваходзяць у топ самых высокааплатных супрацоўнікаў па краіне. Гэта і не дзіва, большасць з іх — надзвычай запатрабаваныя айці-спецыялісты. Медыянны заробак у гэтым сектары роўны 3171 рублю, прычым з 57 тысяч чалавек, занятых у сферы, блізу 7 тысяч маюць заробак больш за 10 тысяч рублёў. Каля 70% беларусаў, хто мае такі заробак, працуюць менавіта ў гэтай галіне.

Адукацыя

Адна з самых шматлікіх сфер, у якой працуе больш за 340 тысяч чалавек, адначасова з'яўляецца адной з самых малааплатных у Беларусі. Колькі б Лукашэнка ні абяцаў падняць даходы настаўнікам, іх заробак наўрад ці можна назваць належным.

Мяркуйце самі: медыянны заробак работнікаў адукацыі ў лістападзе 2023 склаў 1098 рублёў. Калі зірнуць на статыстыку па абласцях, атрымліваецца яшчэ горш — у Віцебскай вобласці яна роўная 961 рублю.

Выходзіць, каля 20% педагогаў у краіне зарабляюць менш за 700 рублёў! Толькі 13 чалавек у гэтай сферы могуць пахваліцца заробкам, які перавышае 10 тысяч рублёў.

Ахова здароўя

Ахова здароўя яшчэ адна сацыяльная сфера, дзе працуе шмат беларусаў — амаль 265 тысяч. Улады таксама надаюць ёй шмат увагі. Напрыклад, праз вялікі адток кадраў планавалі павялічыць тэрмін абавязковай адпрацоўкі для спецыялістаў, якія навучаліся на бюджэце.

Адна з магчымых прычын бракавання персаналу — невялікая зарплата. Так, медыянны паказчык у сферы складае каля 1300 рублёў — адзін з самых нізкіх у краіне. Каля 70 тысяч медработнікаў маюць даход меншы за 1000 рублёў.

Дарэчы, на рынку вакансій медсёстрам у сярэднім прапануюць да 1000 рублёў. Лекарам — больш. Напрыклад, у Баранавіцкай гарадской лякарні доктару анестэзіёлагу-рэаніматолагу з досведам працы ад 2 гадоў абяцаюць ад 2100 да 2400 рублёў, хірургу — 2000-2300 рублёў.

Сельская гаспадарка

Тут сітуацыя таксама не лепшая. З 247 тысяч работнікаў зарплата 45 тысяч не перавышае адзнакі ў 800 рублёў. Медыянны заробак у цэлым па галіне складае 1300 рублёў.

Прамысловасць

А гэта самая папулярная сфера эканамічнай дзейнасці, тут занятыя каля 635 тысяч чалавек, медыянны заробак складае 1736 рублёў. Прычым у горназдабыўной прамысловасці медыянны заробак роўны 3781 рублю — самы высокі паказчык па краіне.

Пры гэтым звесткі розняцца ў залежнасці ад вобласці. Калі ў Гродзенскай медыянны заробак у сферы ледзь перавышае 1000 рублёў, то ў Гомельскай можна атрымліваць амаль 4 з паловай тысячы. І нават нягледзячы на гэта, амаль 80 тысяч работнікаў у галіне прамысловасці атрымліваюць менш за 1000 рублёў.

Дзяржаўнае кіраванне

Сярэдняя статыстыка па краіне ў гэтым сектары схаваная. Аднак апублікавалі дадзеныя па абласцях. Напрыклад, чыноўнікі з Брэсцкай вобласці маюць медыянны заробак 1820 рублёў, з Гродзенскай — 1796, Мінскай — 1690. Усяго ў Беларусі налічваецца каля 61 тысячы такіх работнікаў. 14 чалавек мае даход, які перавышае 10 тысяч рублёў.

***
Даведка. Медыянны заробак — паказчык, які дзеліць заробкі ў краіне на дзве часткі: палова работнікаў мае заробак меншы за яго, палова — большы. Звесткі па ёй публікуюцца двойчы на год — за травень і лістапад. У Беларусі за паўгода медыянны заробак вырас на 99 рублёў.