Беларус у Вялікабрытаніі: “Такое пачуццё, што мы прачнуліся ў іншай краіне”
Брытанцы на рэферэндуме прагаласавалі за выхад з Еўрасаюза. Гэтае рашэнне падтрымалі 52% (17,41 млн чалавек), за тое, каб застацца ў ЕС, аддалі свае галасы 48% (16,14 млн).
Яўка была высокай — 72,2%, але ніжэй, чым на рэферэндуме ў Шатландыі ў 2014 годзе: тады сваю волю выказалі 84,6% выбаршчыкаў.
Больш за ўсё людзей за “брэкзіт” прагаласавала ў Бостане (75,6%), Саўт-Холандзе (73,6%) і Касл-Пойнце (72,7%). За тое, каб застацца, больш за ўсё аддалі свае галасы ў Гібралтары (95,9%).
Фондавыя рынкі імгненна адрэагавалі на вынікі. Цана нафты Brent упала на 6,2% — да 47,7 долара за барэль. Курс фунта да долара падчас ранішніх таргоў на пазабіржавым рынку Форэкс абваліўся на 10% — за 1 фунт давалі 1,34 долара. Такога не бывала з 1985 года. Моцна панізіўся і курс еўра.
Гэтая падзея адбілася нават на Беларусі. Курс еўра панізіўся на 155 рублёў, а долар вырас на 250 рублёў.
Вынікі рэферэндуму выклікалі рэзананс у брытанскіх і еўрапейскіх палітыкаў.
У сваёй прамове пасля абвяшчэння вынікаў рэферэндуму прэм’ер Вялікабрытаніі Дэвід Кэмеран заявіў, што праз некалькі месяцаў сыдзе ў адстаўку.
“Брытанскі народ вырашыў рухацца іншым шляхам. Такім чынам, ім патрэбны новы прэм’ер-міністр”.
Старшыня партыі нацыяналістаў Паўночнай Ірландыі Дэклан Кірні кажа, што ў выпадку выхаду Вялікабрытаніі з ЕС брытанскі ўрад пазбавіцца паўнамоцтваў прадстаўляць інтарэсы жыхароў Паўночнай Ірландыі, і гэта стане падставай для аб’яднання рэгіёна з Ірландыяй.
Канцлерка Германіі Ангела Меркель назвала вынікі рэферэндуму “пераломным момантам у Еўропе”.
“Казаць няма пра што. Сённяшні дзень стаў пераломным момантам для Еўропы, пераломным момантам для еўрапейскага працэсу аб’яднання”, — гаворыць Меркель. Нямецкая канцлерка лічыць, што на Германіі ляжыць асаблівая адказнасць, але і роўная зацікаўленасць у тым, каб аб’яднанне Еўропы мела поспех.
Пры гэтым Меркель перасцерагла ад таго, каб рабіць “хуткія і простыя высновы” з таго, што адбылося. На думку канцлеркі, цяпер трэба шмат што прааналізаваць “разважліва і спакойна”.
Старшыня Еўрасавета Дональд Туск паведаміў, што на наступным тыдні пройдзе першы саміт ЕС без Вялікабрытаніі. А без Злучанага Каралеўства аб’яднаная Еўропа не загіне, а стане толькі мацнейшай.
Кіраўнік Еўрапарламента Марцін Шульц сказаў, што перамовы аб выхадзе Вялікабрытаніі з ЕС пачнуцца найбліжэйшым часам.
“Вялікабрытанія вырашыла пайсці сваім шляхам. Я думаю, што эканамічныя дадзеныя сённяшняй раніцы сведчаць, што гэта будзе вельмі цяжкі шлях”, — сказаў ён.
Міністр замежных справаў Германіі Франк-Вальтэр Штайнмаер напісаў у твітары: “Навіны з Вялікабрытаніі сапраўды абцяжарваюць. Усё кажа пра сумны дзень для Еўропы і Вялікабрытаніі”.
Пра жаданне правесці рэферэндум па выхадзе з Еўрасаюза заявіў цэлы шэраг палітыкаў у розных краінах.
Беларус, магістрант оксфардскага ўніверсітэта, які цяпер жыве Вялікабрытаніі, Георгі Плашчынскі, кажа, што такія вынікі рэферэндуму былі нечаканасцю:
“Апытанні грамадскага меркавання паказвалі, што імавернасць таго, што Брытанія застанецца ў складзе Еўрасаюза, большая. І па рэакцыі людзей у Оксфардзе і Лондане, якія ў большасці галасавалі за "застацца", можна сказаць што для іх вынікі нечаканыя. Можа быць, для людзей у іншых частках краіны і чаканыя, але не для еўрацэнтрычных гарадоў”.
Выглядае, што шакаваныя і брытанскія СМІ. Па словах Георгія, існуе адчуванне, што людзі прачнуліся ў іншай краіне. Усе ў чаканні значных зменаў. Аб’ява Дэвіда Кэмерана пра адстаўку дае падставы меркаваць аб палітычным крызісе.
“Таксама змены могуць быць у тэрытарыяльным плане. Уся Шатландыя прагаласавала за тое, каб застацца ў Еўрасаюзе. Таму яны могуць правесці чарговы рэферэндум па пытанні незалежнасці ад Вялікабрытаніі”, — выказвае меркаванне магістрант.
Такія палітычныя крокі могуць адбыцца і ў Паўночнай Ірландыі. Таксама ўжо адчувальныя эканамічныя наступствы. Акрамя падзення курса фунта занепакоіліся інвестары. Ніхто не можа прадказаць, што будзе з эканомікай далей, бо гэта будзе залежыць ад вынікаў гандлёвых перамоваў з ЕС, мяркуе Георгі Плашчынскі.
