АБФФ заклікала футбольных заўзятараў годна паводзіць сябе на трыбунах
Беларуская федэрацыя футболу заклікала заўзятараў годна паводзіць сябе на трыбунах падчас матчаў. Як сказана ў звароце, размешчаным на сайце федэрацыі, адзін з асноватворных прынцыпаў футболу — правіла фэйр-плэй, якое распаўсюджваецца не толькі на футбалістаў, суддзяў, функцыянераў, але і на іншых удзельнікаў матчу.
“У той жа час у заключнай частцы чэмпіянату краіны пачасціліся выпадкі парушэння грамадскага парадку з боку заўзятараў — як на стадыёнах падчас матчаў, так і па-за спартыўных збудаванняў.
З трыбун — як з фанацкіх, так і цэнтральных сектараў — гучыць ненарматыўная лексіка, абразы, нярэдкія выпадкі выкарыстання піратэхнічных вырабаў, усё часцей органамі ўнутраных спраў фіксуюцца факты масавых боек сярод футбольных фанатаў па-за стадыёнаў”, — заяўляюць у АБФФ.
Такая тэндэнцыя выклікае ў футбольных функцыянераў сур'ёзную занепакоенасць, таму ўсіх наведнікаў футбольных матчаў і іншых масавых мерапрыемстваў заклікаюць датрымлівацца правілаў паводзінаў на стадыёнах, з павагай ставіцца як да гульцоў, так і да заўзятараў.
Апроч таго, у ФБФФ нагадалі, што парушэнні грамадскага парадку не толькі дастаўляюць нязручнасці іншым гледачам, але могуць пацягнуць за сабой пакаранне з боку органаў правапарадку.