21-гадовы пінчук уцякаў ад ДАІ на машыне свайго дзядулі
Праваахоўнікі ганяліся за парушальнікам дарожнага руху па Івацэвічах і ваколіцах горада.
Галівудскую пагоню за 21-гадовым кіроўцам-бяспраўнікам зладзілі даішнікі з Івацэвіцкага раёна. Інцыдэнт здарыўся сёння ў першай палове дня. У вёсцы Сяньковічы дарожныя інспектары спынілі аўтамабіль Fiat Ducato. Падставай для спынення стала значнае перавышэнне хуткасці — замест дазволеных 60 км/гдз шафёр гнаў 94 км/гдз. Малады чалавек спачатку спыніўся, сказаў, што не мае правоў і паабяцаў прайсці ў машыну інспектара з усімі астатнімі дакументамі. Але як толькі інспектар адышоў, хлопец завёў машыну і кінуўся ўцякаць.
За ім гнаўся інспектар на машыне і патрабаваў спыніцца, але парушальнік не рэагаваў. Калі Fiat уехаў у Івацэвічы, да пагоні далучыўся яшчэ адзін нарад ДАІ. Праваахоўнікі спрабавалі апярэдзіць ліхача, але ён не даваў гэтага зрабіць. Калі ж адзін з даіншых аўтамабіляў пачаў яго абганяць, кіроўца ўдарыў яго ў бок.
Тады да гэтай “галівудскай пагоні” далучыліся і супрацоўнікі Дэпартамента аховы. Пераслед працягваўся па вёсцы Стайкі, затым па вёсцы Гошчава, а потым парушальнік зноў вярнуўся ў Івацэвічы. Пры гэтым ён ствараў аварыйную небяспеку на цэнтральных вуліцах горада.
Спыніла яго толькі раптоўнае сутыкненне з агароджай у гаражным кааператыве, куды парушальнік заехаў. Але і пасля гэтага хлопец не здаваўся: ён выскачыў з машыны разам са сваім пасажырам і пабег. Інспектары ДАІ ўсё ж затрымалі ўцекачоў.
Высветлілася, што малады кіроўца жыве ў Пінску і месяц таму яго пазбавілі правоў за паўторнае перавышэнне хуткасці цягам года. На парушальніка складаюць адміністратыўныя пратаколы. Аўтамабіль належыць дзядулі хлопца, паведамляе Брэсцкая абласная ДАІ.