Яшчэ адзін беларус загінуў у маскоўскім метро
23-гадовы беларус загінуў у маскоўскім метро. Здарэнне адбылося 19 верасня каля 16.00 на станцыі “Універсітэт”. Як паведамляе БЕЛТА са спасылкай на прэс-службу УУС на Маскоўскім метрапалітэне, пасля сутыкнення з саставам электрацягніка малады чалавек атрымаў пашкоджанні, несумяшчальныя з жыццём.
У паліцыі таксама паведамілі, што вядзецца апытанне сведкаў і вывучаюцца матэрыялы з камер відэаназірання, якія дазволяць высветліць абставіны здарэння.
Каб дастаць цела загінулага, падачу электраэнергіі на рэйкі спынілі на 20 хвілінаў.
