Выставу рэпрадукцый Казіміра Малевіча пад адкрытым небам зладзяць у Мінску
Творы вядомага мастака-авангардыста можна будзе паглядзець на плошчы Якуба Коласа. Выстава адкрыецца 6 чэрвеня і працягнецца да 20 верасня.
Як адзначае БЕЛТА, выстава пройдзе ў рамках гарадскога праекта "Мастак і горад". Ён ладзіцца ўжо другі год запар. Летась мінчукі і госці сталіцы маглі пазнаёміцца з рэпрадукцыямі карцін Марка Шагала.
Экспазіцыя з 18 твораў Малевіча будзе суправаджацца тэкставым апісаннем на трох мовах — беларускай, рускай і англійскай.
Нагадаем, што паводле адной з версіяў, Казімір Малевіч нарадзіўся ў Капылі на Міншчыне. Прынамсі, так сцвярджае доктар фізіка-матэматычных навук, прафесар, пісьменнік і ўнучаты пляменнік мастака Ігар Малевіч.
Фота — calend.ru
