Відэа: Наколькі бяспечна праязджаць месца гібелі раварысткі?
Толькі кожны трэці раварыст на веладарожцы мае ўначы ўключаны ліхтарык, каля паловы ліхтароў на мачтах увогуле не працуе.
“Створаная аператыўная група на базе адміністрацыі раёна. Туды ўваходзяць прадстаўнікі Рэмаўтадора, БАЭС, Мінскага роварнага таварыства. Праводзіцца маніторынг веладарожкі. І потым на яго падставах прымаюцца рашэнні — ці патрэбны нейкі рамонт. Напрыклад, калі прасяданне палатна альбо яшчэ нешта”, — расказвае Еўрарадыё дырэктар фізкультурна-аздараўляльнага цэнтра Цэнтральнага раёна Мінска Алег Чысалаў.
Адказнымі за стан самай працяглай і знакамітай сталічнай веладарожкі цікаўлюся пасля начной паездкі па ёй. Праехаўшы дарожку амаль цалкам — ад аквапарка да Серабранкі, — на ўласнай шкуры запэўніваюся: ездзіць па ёй лепш марудна, асцярожна і днём. Іначай можна паўтарыць лёс 24-гадовай дзяўчыны, якая сутыкнулася з іншым веласіпедыстам, моцна ўдарылася галавой і праз некалькі гадзін памерла.
Так выглядае рух на веладарожцы увечары.
Сярэдняя хуткасць раварыстаў на веладарожцы — каля 20 кіламетраў за гадзіну. Сустрэчная — ужо 40. Гэтага дастаткова для самых сумных наступстваў аварыі. Тым больш што раварыстаў цёплым летнім вечарам на дарожцы процьма — толькі паспяваю ўварочвацца ад сустрэчных.
Але па-сапраўднаму страшна на веладарожцы з надыходам цемнаты. Добра калі тры з дзесяці сустрэчных веласіпедаў маюць ліхтарык. Разгледзець нешта за паваротамі дарожкі немагчыма — сустрэчныя сілуэты вымалёўваюцца ў апошні момант перад раз’ездам. Яшчэ горш з аматарамі ролікавых канькоў — катаюцца яны амаль бясшумна, на сабе не маюць нават флікераў. За 25 кіламетраў дарожкі ледзьве не збіваю ў цемры траіх.
Так - уначы.
Праязджаю тое месца, дзе загінула веласіпедыстка, — кароткі ўчастак побач з лыжа-ролернай трасай, размешчаны паміж двума мастамі. Калі проста каціцца з боку “Мінск-Арэны” не круцячы педалі (менавіта адтуль рухалася загінулая дзяўчына), хуткасць паміж мастамі дасягае 30 кіламетраў за гадзіну. Страшнавата нават на пустыннай веладарожцы. Тым больш слаба асветленай — побач з месцам гібелі дзяўчыны не гарыць кожны другі ліхтар. А бліжэй да Серабранкі можна ехаць у поўнай цемры сотні метраў.
Участак дарожкі, на якім загінула раварыстка.
Алег Чысалаў расказвае, што акурат з рамонтам асвятлення на веладарожцы могуць узнікнуць замінкі.
“Маніторынг у нас праводзіцца ў светлы час сутак. Таму мы ведаем пра праблему з асвятленнем толькі калі паступаюць нейкія скаргі. Але рамонтам асвятлення мы не займаемся — накіроўваем інфармацыю ў Гарсвятло. Гэта арганізацыя пры Мінгарвыканкаме. Як аператыўна яны зрэагуюць, цяжка сказаць”.
Праблем з добраўпарадкаваннем дадае тое, што адзінай арганізацыі, адказнай за стан веладарожкі, проста не існуе. У Мінгарвыканкаме гавораць, што кожны з раёнаў горада адказвае за свой участак. Калі дадаць сюды Гарсвятло, колькасць адказных амаль зашкальвае. Што не замінае стану веладарожкі пагаршацца год за годам.