Украіна зрабіла больш жорсткім кантроль за ўездам і выездам замежнікаў
![Украіна зрабіла больш жорсткім кантроль за ўездам і выездам замежнікаў](/sites/default/files/styles/gallery_main/public/2023-08/1482917622-3915_0.jpg.webp?itok=vvJ-IQXg)
Украіна зрабіла больш жорсткім кантроль за ўездам і выездам замежнікаў. Адпаведны ўказ падпісаў украінскі прэзідэнт Пётр Парашэнка. Ім было ўведзена ў дзеянне ранейшае рашэнне Савета нацыянальнай бяспекі і абароны Украіны. Як інфармуе УНІАН, новаўвядзенне мусіць умацаваць нацыянальную бяспеку, узмацніць кантроль за ўездам і выездам з краіны.
Украінскі ўрад абновіць пералік краін міграцыйнай рызыкі. Ужо цяпер вядома, што ў яго ўнясуць Расію. З 1 студзеня 2018 года з такіх дзяржаў уехаць ва Украіну можна будзе толькі па біяметрычных пашпартах. Калі ж у грамадзян іх няма, тады біяметрычныя дадзеныя зафіксуюць на мяжы. Па словах Парашэнкі, працэдура будзе праходзіць у тры этапы. Першы — чалавек падае папярэдняе паведамленне пра тое, што ён збіраецца прыехаць ва Украіну. Другі — непасрэдная фіксацыя дадзеных на мяжы. Трэці — фіксацыя чалавека на месцы, дзе ён плануе знаходзіцца.
“Лічу, што гэта практыка, якая распаўсюджана ва ўмовах, калі краіна з’яўляецца аб’ектам ваеннай агрэсіі з боку Расійскай Федэрацыі, гэта практыка зусім апраўданая”, — сказаў прэзідэнт Украіны.
![Украіна зрабіла больш жорсткім кантроль за ўездам і выездам замежнікаў](/sites/default/files/paragraphs/image/1461224395-2136.jpeg)