У Ждановічах п’яная дзяўчына-кіроўца кідалася на даішнікаў (фота)
У Ждановічах пад Мінскам неадэкватная дзяўчына-кіроўца кідалася на даішнікаў, якія прыехалі разбірацца ў здзейсненай аварыі. Ля прыпынку грамадскага транспарту на разваротным коле аўтобуса дзяўчына праехала на "Лексусе" пад “цагліну”, а пасля збочыла з дарогі, знесла знак і вылецела ў кювет. Машына ў выніку дала нырца ў лужыну.
Сведкі здарэння выклікалі ДАІ, якая прыбыла даволі хутка. Па словах прысутных, кіроўца "Лексуса" стала крычаць, супраціўляцца інспектарам і скандаліць, а пасля нават напала на іх. Праваахоўнікам давялося прымяніць кайданкі. Пасля дзяўчыну павезлі на медагляд, паведамляе Onliner.by са спасылкай на сведкаў здарэння.
Як высветлілася, дзяўчыне 25 гадоў. Яна села за руль у нецвярозым стане — у яе крыві знайшлі 2,12 праміле алкаголю. Раней яна тройчы прыцягвалася да адказнасці, у тым ліку за парушэнне хуткаснага рэжыму, інфармуе БЕЛТА.
