У Наваполацку мужчына задушыў сваю жонку і напаў на дачку
Яго затрымалі міліцыянеры ў аўтамабілі каля дома.
У Наваполацку 46-гадовы мужчына задушыў сваю 48-гадовую жонку. Таксама ён нанёс цялесныя пашкоджанні 19-гадовай дачцэ. Міліцыю выклікала яе старэйшая сястра.
Як паведамляе БЕЛТА, на месца здарэння прыехала следча-аператыўная група, група хуткага рэагавання міліцыі, супрацоўнікі Дэпартамента аховы, ДАІ і Дзяржаўнага камітэта судовых экспертызаў. Яны спадзяваліся гэтымі сіламі затрымаць па гарачых слядах падазраванага ў забойстве. І сапраўды яго хутка схапілі — мужчына знаходзіўся ў аўтамабілі каля дома.
У адносінах затрыманага распачалі крымінальную справу па артыкуле "забойства". Адзначаецца, што раней мужчына не меў праблемаў з законам. Медычнае асведчанне паказала, што ён быў цвярозы, не быў у стане наркатычнага ап'янення. Паколькі следства мае дадзеныя пра дзіўныя паводзіны падазраванага, была прызначана яго комплексная псіхолага-псіхіятрычная экспертыза.
Дарэчы, абедзве дачкі мужчыны былі шпіталізаваныя. Пра стан іх здароўя нічога не паведамляецца.
Фота: ria.ru
