У Мінску масава судзілі ўдзельнікаў антыінтэграцыйных акцый

26 снежня ў Мінску масава судзілі ўдзельнікаў антыінтэграцыйных вулічных акцый, якія прайшлі ў снежні. У большасці выпадкаў людзей штрафавалі на сумы ад 510 да 1275 рублёў.

У Цэнтр ізаляцыі правапарушальнікаў на Акрэсціна трапіў лідар пратэстаў Павел Севярынец. Раніцай у чацвер яго затрымала міліцыя і адвезла ў суд, які аштрафаваў апазіцыянера на 1275 рублёў. Пасля гэтага Савярынца адправілі за краты адбываць прысуджаны яму тыдзень таму 15-суткавы арышт — за несанкцыянаваныя вулічныя акцыі супраць інтэграцыі Беларусі з Расіяй.

Як інфармуюць праваабаронцы, у судзе Маскоўскага раёна Мінска на 5 сутак арышту і на штраф (1275 рублёў) асуджаная Алена Талстая. Яна аб'явіла галадоўку. Талстую затрымалі ў зале суда і вывелі міліцыянеры.

Таксама ў чацвер былі асуджаныя на штраф: Віктар Кавалькоў (айцец Вікенцій), Зміцер Казакевіч — па 1275 рублёў, Наталля Саматыя, Андрусь Войніч, Алесь Лагвінец, Ірына Шчасная, Ілля Дабратвор — па 765 рублёў, Пётр Папраўка і Дзяніс Садоўскі — па 510 рублёў. Аляксей Прохараў атрымаў 127,5 рубля штрафу за перапост афішы акцыі "Жывы ланцуг".

Больш падрабязна пра суды можна паглядзець тут.