У Маскве падпалілі будынак швейнага цэху: загінула 12 чалавек
У Маскве 12 чалавек загінулі па пажары ў будынку швейнага цэху. Па версіі расійскай паліцыі, прычынай здарэння стаў падпал: распачатая крымінальная справа па факце наўмыснага знішчэння маёмасці, якое пацягнула па неасцярожнасці смерць людзей. Ёсць таксама версія, што пажар пачаўся з-за няправільнага выкарыстання электраабсталявання ці неасцярожнага абыходжання з агнём.
Пажар пачаўся ўвечары 30 студзеня і быў ліквідаваны ў 0.55 па маскоўскім часе. Пад заваламі знайшлі целы дзевяці чалавек “неславянскай знешнасці”. Пазней знайшлі яшчэ двух загінулых дарослых і немаўля, паведамляюць расійскія СМІ.
Мяркуецца, што ўсе загінулыя працавалі на швейным прадпрыемстве, якое займалася вырабам пасцельнай бялізны.
