У Магілёве ў сераду судзілі саліста гурта Nizkiz
Аляксандр Ільін / b-g.by
У Магілёве 10 студзеня судзілі саліста гурта Nizkiz Аляксандра Ільіна. Яго абвінацілі ў "распаўсюдзе экстрэмісцкіх матэрыялаў".
Як стала вядома Еўрарадыё, у панядзелак адбыўся суд над басістам гурта Сяргеем Кульшам і бубначом Змітром Халяўкіным, а над Аляксандрам Ільіным — толькі ў сераду. Спярша паведамлялася, быццам суд над Ільіным адбыўся таксама 8 студзеня.
Тым часам праваабаронцы настойваюць, што над Ільіным адбыліся два суды: "Згодна з раскладам на сайце Вярхоўнага суда, у Магілёве разглядаліся розныя адміністрацыйныя справы супраць музыкі Аляксандра Ільіна. Пра гэта сведчаць розныя нумары справаў: 08.01 — 141АП2458, а 10.01 —141АП2496".
Пра затрыманне траіх удзельнікаў гурта Nizkiz стала вядома 6 студзеня. Сілавікі схапілі ў Магілёве вакаліста і аўтара песень Аляксандра Ільіна, бас-гітарыста Сяргея Кульшу і бубнача Змітра Халяўкіна. У судзе Ленінскага раёна Магілёва 8 студзеня над імі адбыўся суд. Справу разглядала суддзя Вікторыя Палякова. Прысуды музыкам невядомыя.
