У казахстанскую вёску прыйшла невядомая “сонная хвароба”
Хворы можа літаральна заснуць на хаду, а прачнуцца толькі праз дзесяць дзён.
На поўначы Казахстану ў вёсцы Калачы назіраецца незвычайная хвароба, якую лекары называюць “энцэфалапатыяй невядомага генеза”, а людзі — проста “сонная хвароба”. Жыхары вёскі засынаюць на працяглы час, прычым гэта можа адбыцца і дома, і на працы.
Але пры гэтым хворыя не заўсёды выключаюцца цалкам. Яны могуць нават размаўляць і хадзіць, але нічога з гэтага не памятаюць, пасля таго як апрытомнеюць.
Упершыню хвароба пачала масава праяўляцца ўвесну 2013 года, хоць адзінкавыя выпадкі, як сцвярджалі мясцовыя лекары, рэгістраваліся і раней. З тых часоў болей за 100 чалавек “засыналі” ў вёсцы Калачы, насельніцтва якой — каля 600 чалавек.
Медыкі і навукоўцы пакуль не могуць назваць прычыны гэтай дзіўнай з’явы, перадае ВВС.
Фота: REUTERS
