У Гомелі гарэў стралковы цір

У Гомелі гарэў стралковы цір па вуліцы Сасновай. Як пішуць ратавальнікі, паведамленне пра пажар яны атрымалі ў пятніцу каля 11-й гадзіны. Агонь ахапіў дах будынка. На месца прыехала шмат спецтэхнікі МНС.

У будынку было моцнае задымленне. У момант узнікнення пажару там знаходзіліся 19 чалавек. Да прыбыцця ратавальнікаў 18 чалавек самастойна выйшлі. Пры правядзенні разведкі ў будынку ў кабінеце выявілі 41-гадовага мужчыну, якога вывелі на вуліцу з выкарыстаннем маскі для выратаванага.

Адбылося частковае абвальванне даху на плошчы каля 20 квадратных метраў. Гарэнне адбывалася ў стралковай зале, у памяшканні бліндажу, прызначаным для захоўвання мішэняў і іншага абсталявання, які ўжываецца пры стрэльбах (столь і сцены бліндажу па ўсім перыметры абабітыя гумай).

Пажар ліквідавалі ў 13:25. Прычына ўзгарання высвятляецца.