У Беларусі для кітайскіх студэнтаў працягнулі на 2 тыдні зімовыя канікулы

У Беларусі для кітайскіх студэнтаў працягнулі на 2 тыдні зімовыя канікулы. Такую рэкамендацыю ВНУ краіны атрымалі з Міністэрства адукацыі. Працягненне канікул датычыць тых замежнікаў, якія паехалі на радзіму святкаваць кітайскі Новы год. Прычына — распаўсюд у КНР каранавіруса. Ужо вядома пра больш за сотню ахвяр захворвання.

Студэнцкія канікулы пачаліся 25 студзеня, да 10 лютага кітайцы мусілі вярнуцца ў Беларусь. Цяпер жа іх прыезд адкладзены да канца лютага. З-за працяглых канікул у ВНУ збіраюцца распрацаваць індывідуальныя графікі навучання для кітайцаў.

Грамадзяне КНР вучацца не толькі ў Мінску, але і ў рэгіянальных ВНУ. Агулам кітайскіх студэнтаў у нашай краіне налічваецца каля 4000. Кожны трэці з іх навучаецца ў БДУ.

На сённяшні дзень у Беларусі не выяўлена ніводнага выпадку захворвання на новы тып каранавіруса. Нашы ўлады не плануюць прыпыніць безвіз з КНР. У нацыянальным аэрапорце "Мінск" будзе наладжаны двайны медыка-санітарны кантроль.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.