Стрыжак: Ужо сабралі звыш 20 тысяч долараў, але адных штрафаў ― на 35 тысяч
Грошы з усяго свету пералічваюць неабыякавыя людзі, каб дапамагчы беларусам, якія былі пакараныя за акцыі пратэсту, і іх сем’ям. На сёння на рахунак кампаніі салідарнасці BY_help пералічана звыш 20 тысяч долараў. Пра гэта Еўрарадыё расказаў адзін з каардынатараў кампаніі Андрэй Стрыжак.
Стрыжак: “У першую чаргу, мы цяпер займаемся пакрыццём пільных патрэб тых сем’яў, якія трапілі ў складаную сітуацыю ў сувязі з распачатай крымінальнай справай па тых беспарадках, якія ўлада нібыта прадухіліла. Што да таго, як мы будзем дапамагаць тым людзям, якія трапілі на суткі альбо атрымалі штрафы ― я заклікаю ўсіх пісаць у асабістыя паведамленні старонкі BY_help, і там людзям дадуць усе інструкцыі наконт таго, як атрымаць гэтую дапамогу. Пытанне толькі ў тым, што цяпер сабрана больш за 20 тысяч долараў, але адных толькі штрафаў за гэты час было выпісана на 35 тысяч. І пакуль мы не пакрываем усю суму гэтымі зборамі”.
Па словах Стрыжака, каардынатары кампаніі салідарнасці BY_help шчыльна супрацоўнічаюць з беларускімі праваабаронцамі. І сумесна прымаюць рашэнні на падставе сабранай праваабаронцамі інфармацыі, каму найперш неабходна дапамагчы.
Каб прадухіліць любыя абвінавачванні, кажа Андрэй Стрыжак, каардынатары кампаніі пастаянна даюць справаздачы: і колькі грошай сабрана і колькі было выдаткавана на дапамогу.
