Скандал: ФСБ знайшла ў санаторыі "Беларусь" апаратуру для праслухоўвання
Дзяржустанова "Санаторый "Беларусь" належыць да Упраўлення справамі прэзідэнта Беларусі і месціцца ў расійскім горадзе Сочы.
Як паведамляе "Наша ніва", 23 траўня (але на гэта СМІ звярнулі ўвагу толькі цяпер) Арбітражны суд Краснадарскага краю разгледзеў справу па заяве Кіраўніцтва Федэральнай службы па надглядзе ў сферы сувязі, інфармацыйных тэхналогій і масавых камунікацый да санаторыя "Беларусь". Санаторый прыцягвалі да адказнасці за "здзяйсненне прадпрымальніцкай дзейнасці з парушэннем умоваў, што прадугледжваецца спецыяльным дазволам".
Паводле інфармацыі, што паступіла ад Упраўлення ФСБ Расіі па Краснадарскім краі, у санаторыі без адпаведнай ліцэнзіі былі ўсталяваныя тэхнічныя сродкі, прызначаныя для правядзення аператыўна-вышуковых мерапрыемстваў пры дапамозе тэлефоннай сувязі, бяздротавага інтэрнэту.
Паводле расійскай Канстытуцыі, абмежаванне таямніцы сувязі дапускаецца толькі па рашэнні суда. У санаторыя "Беларусь" паўнамоцтваў на выкарыстанне такіх сродкаў не было.
Суд пацвердзіў факт адміністрацыйнага правапарушэння, аднак прыцягнуць санаторый да адказнасці не атрымалася. Скончыўся тэрмін, які складаў тры месяцы: парушэнне было зафіксаванае 31 студзеня 2013-га, а пастанова вынесеная 23 траўня.
Санаторый "Беларусь" размяшчаецца на ўзбярэжжы Чорнага мора. Там неаднаразова адпачываў Аляксандр Лукашэнка.
Фота — grand-turizmo.ru