Санкцыі з Беларусі здымуць нягледзячы на просьбы з боку апазіцыі?
Пачатак бягучага тыдня ў міністра замежных спраў Беларусі Уладзіміра Макея выдаецца напружаным — сустрэча з еўрапейскімі дыпламатамі. Так, 9 лютага ён сустракаецца з палітычнымі дырэктарамі міністэрстваў замежных спраў краін Вышаградскай групы Іванам Естржабам з Чэхіі, Левентэ Бенкё з Венгрыі, Багумілай Ордык з Польшчы і Пэтэрам Мішыкам са Славакіі. У той жа дзень Макей прымае Генеральнага дырэктара па палітычных пытаннях МЗС Вялікабрытаніі Саймана Гаса. На наступны дзень, 10 лютага Уладзімір Макей сустракаецца з Генеральным сакратаром знешепалітычнай установы Аўстрыі Міхаэлем Лінхартам і прымае палітычнага дырэктара МЗС ФРГ Андрэаса Міхаэліса.
Здавалася, што тут асаблівага — звычайная праца кіраўніка МЗС. Калі б не два факты. Першы: ужо 15 лютага Савет міністраў ЕС агучыць рашэнне наконт санкцый у дачыненні да Беларусі — альбо працягнуць іх існаванне ў “замарожаным стане”, альбо зняць канчаткова, альбо вярнуць. І кансультацыі па гэтым пытанні менавіта ў гэтыя дні ідуць у Бруселі. А ў паведамленнях прэс-службы беларускага МЗС па выніку ўсіх пералічаных сустрэч адзначаецца: “Абмяркоўваліся перспектывы нармалізацыі адносінаў Беларусі з Еўрасаюзам”.
І другі факт: на цырымоніі адкрыцця амбасады Аўстрыі ў Беларусі генеральны сакратар па замежных справах гэтай краіны Міхаэль Лінхарт прызнаецца:
“Аўстрыя выступае за адмену санкцый у дачыненні да Беларусі. У гэтым сэнсе мы на баку Беларусі”.
Адзін ёсць. Ці агучвалі пазіцыю сваіх краін па гэтым пытанні іншыя ўдзельнікі сустрэч з Уладзімірам Макеем?
“Мы не раскрываем змест двухбаковых сустрэч — змест дыпламатычных перамоў мае як мінімум канфідэнцыйны характар”, — ухіляецца ад раскрыцця таямніц кіраўнік прэс-службы айчыннага знешнепалітычнага ведамства Дзмітрый Мірончык.
Маўляў, калі замежныя госці захочуць, самі скажуць усё неабходнае журналістам. Вось толькі міністры з краін Вышаградскай групы ў сустрэчы карэспандэнту Еўрарадыё адмаўляюць. Нічога не казалі яны наконт пазіцыі сваіх краін адносна санкцый і падчас сустрэчы з лідарамі беларускай апазіцыі, распавядае лідар АГП Анатоль Лябедзька.
“Не агучвалі яны сваю пазіцыю, быў такі нейтралітэт. І толькі венгерскі прадстаўнік сказаў, што іх стан сённяшніх узаемаадносінаў Венгрыі з беларускім рэжымам задавальняе. Гэта можна трактаваць так, што Венгрыя таксама ўжо вызначылася са сваёй пазіцыяй — каб цяпер зняць санкцыі канчаткова”.
І прызнаецца: паводле яго “ўнутранага адчування” большасць будзе схіляцца да “прагматызму з улікам геапалітыкі”. Маецца на ўвазе, з улікам ролі Беларусі ў спробах урэгулявання ўкраінскага крызісу. Відаць, не вельмі прыемнае адчуванне з улікам таго, што за некалькі гадзін да гэтай сустрэчы лідары беларускай апазіцыі прымаюць сумесную заяву па пытанні санкцый. Там яны найперш заклікалі ЕС не адмяняць “візавыя і фінансавыя абмежаванні ў дачыненні да беларускіх чыноўнікаў і вярнуцца да разгляду гэтага пытання па выніках сёлетніх парламенцкіх выбараў”.
Толькі ў беларускага МЗС магчымасцяў працы з еўрапейскімі партнёрамі значна больш, чым у апазіцыі і таму, сцвярджае палітолаг Дзяніс Мельянцоў, праціўнікаў адмены санкцый у ЕС практычна не застаецца.
Дзяніс Мельянцоў: “Наколькі мне вядома, праблема на сённяшні дзень толькі са Швецыяй. Астатнія ўсе альбо пазітыўна ставяцца да зняцця санкцый, альбо ім па вялікім рахунку ўсё роўна. І таму яны гатовыя прагаласаваць так, як галасуе большасць, у абмен на нейкія там саступкі”.
Але ж вядома, што ўсе рашэнні ў Еўрасаюзе прымаюцца кансенсусам: калі хоць адна краіна выказваецца супраць, рашэнне не праходзіць. Толькі беларускія ўлады добра пра гэта ведаюць і менавіта таму ўжо не адзін месяц “апрацоўваюць” шведаў: статус дыпламатычнага прадстаўніцтва Швецыі павышаюць, шведскаму амбасадару ад імя кіраўніка Беларусі дораць кнігі Святланы Алексіевіч…
Ці атрымаюць намаганні беларускага МЗС станоўчыя вынікі, будзе вядома ўжо 15 лютага.
Фота Змітра Лукашука