Салдата Бенеша, які выступіў супраць дзедаўшчыны, зноўку будуць судзіць

Нагадаем, што Акім Бенеш быў прызваны ў часць супрацьпаветранай абароны 30151 пад Фаніпалем. Увесну гэтага года падчас суда, дзе салдата абвінавачвалі ў нестатутных узаемаадносінах, ён публічна выказаўся наконт сітуацыі у часці: начныя пад’ёмы, адцісканні, “кандагарскія масты”. Акім Бенеш пачаў змагацца з праявай і ў адной з боек ударыў так званага палагена ― салдата-аднагодку, які выступаў на баку дзядоў.

Пацярпелы таксама пацвердзіў некаторыя факты, у тым ліку прызнаўся, што таксама наносіў удар Акіму Бенешу. У выніку Мінскі міжгарнізонны ваенны суд вызваліў хлопца ад крымінальнай адказнасці. Аднак, відаць, наіўна было меркаваць, што салдата пакінуць у спакоі.

Аказалася, што пасля суда выпрабаванні ў яго працягнуліся.

“Падчас суда высветліўся адзін момант, пра які я сам казаў. Пацярпеламу я нанёс удар на апераджэнне. Пасля гэтага мяне збілі ўдвух. Калі пра гэты інцыдэнт даведаліся, то мне вынеслі пракурорскае папярэджанне і на падставе яго адправілі на гаўпвахту на 10 сутак, ― распавядае Акім Еўрарадыё. З салдатам нам удалося звязацца праз бацькоў, калі яго адпусцілі ў 10-дзённы адпачынак. ― Я быў у адзіночнай камеры. Але супрацоўнікам аднойчы не спадабалася мая ўсмешка, гэта палічылі “нетактоўнымі паводзінамі” і пакінулі яшчэ на 10 сутак адзіночнай камеры”. 

Еўрарадыё: То бок вас зноўку будуць судзіць па артыкуле 443 частка 1?

Акім Бенеш: Мяне тады прымірылі з пацярпелым. Але абвінаваўца быў незадаволены такім прысудам. І 18 ліпеня будзе перагляд справы ў Беларускім вайсковым судзе па вуліцы Азгура.

Еўрарадыё: Калі ў вас павінна скончыцца служба?

Акім Бенеш: З улікам гаўптвахты ― 11 снежня 2013 года. Але як яно будзе ― невядома. 

Еўрарадыё: Дзе вы служыце цяпер?

Акім Бенеш: У бабруйскай часці 256869. Тут служба ідзе вельмі добра, добры і афіцэрскі склад. Цалкам прытрымліваюцца статута і добры калектыў. У параўнанні з часцю 30151 ёсць вялікая розніца. Раней на нейкі час я быў прыкамандзіраваны ў Мачулішчы, там таксама было нармальна. Незразумелая сітуацыя была толькі пад Фаніпалем.

Еўрарадыё: Гаўптвахта, суд, напружанне… Гэта адбываецца толькі з вамі ці праз гэта прайшлі і іншыя салдаты з фаніпальскай часці?

Акім Бенеш: Я не ведаю, я з імі зносінаў не маю.

Раней бацька Акіма Бенеша паведаміў, што бачыў на руцэ сына чатыры парэзы, замазаныя зялёнкай. На яго думку, утрыманне сына на гаўптвахце ў адзіночнай камеры рабілася дзеля таго, каб адпомсціць маладому салдату і зламаць яго.

Нагадаем і пра тое, што фаніпальскую ваенную часць 30151 скалыхнула раней іншым трагічным здарэннем. У 2009 годзе тут да смерці збілі радавога Валерыя Шкута. Спачатку ў арміі гібель салдата патлумачылі “раптоўнай смерцю без вядомых прычын”. Праўда, потым факты дзедаўшчыны былі даказаны, восем салдат тады асудзілі.

На гэты раз праяваў дзедаўшчыны ў часці 30151 узброеныя сілы не прызнаюць. 

“Даходзіць да анекдота: чалавек на ўзроўні майстра спорту збівае свайго таварыша, з кім яны прызваны ў адзін і той жа дзень. Што тычыцца падзеяў 2009 года, то на іх была пастаўлена кропка, ― кажа прэс-сакратар Міністэрства абароны Беларусі Уладзімір Макараў. ― Так можаце і падкрэсліць: наша сістэма падтрымання правапарадку ў арміі такая, што кожнае злачынства рана ці позна будзе выяўлена і вінаваты панясе пакаранне. Што і было зроблена ў 2009 годзе, вялікая праца была прароблена пракуратурай”.

Еўрарадыё: Часць 30151 шмат разоў трапляла ў СМІ з-за скандалаў, звязаных з нестатутнымі ўзаемаадносінамі. Ці былі пакараны адказныя афіцэры пасля публікацый у прэсе?

Уладзімір Макараў: Небяспека нестатутных узаемаадносінаў у беларускай арміі на некалькі парадкаў больш нізкая, чым у амерыканцаў і ў іншых краінах дальняга замежжа. У нас па азначэнні не можа быць сітуацый, калі да адказнасці прыцягваюцца дзясяткі людзей ці калі ёсць сотні такіх выпадкаў на сексуальнай глебе, ці калі прымушаюць прымаць спіртныя напоі ў вялікай колькасці і наступае лятальны канец. У кампетэнцыі службовых асоб ― спыніць наступленне цяжкіх наступстваў. Калі гэта зроблена, то афіцэрам гонар і хвала. Калі правапарушэнне выяўляе ўрач, то ніякай літасці да службовых асоб не будзе. У дадзеным выпадку дзедаўшчыны не было.