Yellow Brick Road выступіць на сцэне лепшага клуба Еўропы
Такі прыз атрымалі беларускія музыкі па выніках конкрусу на расійскім партале "Я-талант".
Як распавядаюць самі музыкі, гурт быў даўно зарэгістраваны на гэтым сайце, але не ставіўся да яго конкурсаў сур’ёзна. Пасля вясновых гастроляў па гарадах Расіі у Yellow Brick Road з’явілася шмат новых сяброў, якія і параілі гурту звярнуць увагу на конкурс, галоўным прызам якога з’яўляўся канцэрт у лепшым клубе свету па ацэнцы Lonely Planet - "А 38", што ў Будапешце.
Для ўдзелу ў конкурсе гурт выклаў на адкрытае галасаванне ў Інтэрнэце аўдыё-трэкі ды канцэртнае відэа. Абагнаўшы 185 гуртоў-удзельнікаў з усяго свету, Yellow Brick Road занялі 3-е месца ў агульным галасаванні і першае па выніках асабістага выбару арт-дырэктара клубу.
“Для нас Будапешт – вельмі магічны і цікавы горад, таму мы вельмі абрадаваліся, што нас чакаюць такія прыгоды. – распавядае прамоўтар каманды Зміцер Хламаў. – Абавязкова мы паедзем туды з новым альбомам, і Будапешт стане адным з гарадоў нашага будучага еўрапейскага тура. Вядома, для такога выступу мы падрыхтуем адмысловае шоў і, хутчэй за ўсё, возьмем з сабой нашага аператара, які пасля скарыстае гэтае відэа, напрыклад, для відэашэрагу ці кліпу”
Акрамя, уласна, канцэрту Yellow Brick Road атрымалі ў падарунак тыднёвыя вакацыі і экскурсіі па венгерскай сталіцы. Клуб "А 38", які, дарэчы, месціцца на караблі на самым беразе Дуная, ужо прымаў на сваёй пляцоўцы такіх вядомых музыкаў як Gogol Bordello , Mike Patton, Jane Birkin ды іншых, а вось беларусы выступяць на яго сцэне ўпершыню. Дата выступу гурта пакуль узгадняецца, але, хутчэй за ўсе, ён адбудзецца ў кастрычніку. А для ўсіх тых, хто не хоча чакаць так доўга, нагадаем, што бліжэйшы выступ Yellow Brick Road можна наведаць ужо 14-га ліпеня ў віленскім клубе "Muzikos Rūsys".