Выставу Аляксея Марачкіна ў Віцебску адмянілі
Яна мусіла адчыніцца 30 лістапада ў выставачнай зале мастацка-графічнага факультэту Віцебскага дзяржуніверсітэта.
У каментары Еўрарадыё Аляксей Марачкін распавёў, што выстава меркавалася як юбілейная да першага выпуску мастакоў з мастацка-графічнага факультэта тады яшчэ Віцебскага інстытута. Ён адбыўся акурат 50 гадоў таму. Цяперашняе кіраўніцтва факультэта спярша пагадзілася на выставу, узгадніла тэрміны.
Але ў панядзелак адміністрацыя перадала праз куратарку выставы Кацярыну Мяснікову, што ва ўніверсітэце цэлы тыдзень будзе адбывацца пераатэстацыя і зала будзе занятая.
Марачкін: "Раптам там у іх нейкія складанасці, нейкія мерапрыемствы... Ну дык хаця б прапанавалі пазней выставу зрабіць, ці як... Куратар Кася мне паведаміла, што выставы не будзе. Не будзе, і ўсё!"
Па словах мастака, за апошні час гэта не першая адмова яму. Так, Марачкін атрымаў адмовы на выставы ў Нацыянальным мастацкім музеі і нават у Галерэі "Ў".
Фота — svaboda.org
