Вольга Захаранка: Апошні раз па справе мужа мяне дапытвалі ў 1999 годзе

09/10/2012 - 12:37

Следчы камітэт працягнуў да 24 снежня 2012 года следства па справе былога міністра ўнутраных спраў Юрыя Захаранкі. Адказаў на пытанні, ці гэта звычайная працэдура, ці прычына ў з’яўленні нейкіх новых звестак, прэс-служба Следчага камітэта не дае.

Фармальна гэта азначае, што могуць праводзіцца допыты ды апытанні па справе. Але як стала вядома Еўрарадыё, ніякіх допытаў ці якіх іншых следчых дзеянняў з удзелам родных зніклага Захаранкі следчыя не праводзілі... з 1999 года. Пра гэта распавядае жонка былога міністра Вольга Захаранка, яна цяпер жыве ў Германіі. Пра тое, што справу працягнулі, жонка і дочкі зніклага генерала даведаліся ад… Еўрарадыё.

Вольга Захаранка: “Па першым часе пасля таго, як ён быў скрадзены — праз месяцы два ці найбольшае тры — пару разоў я давала паказанні. Зразумела, я казала, што я думаю і якія падазрэнні маю. А больш з таго часу да мяне ніхто не звяртаўся. Цягам усіх гэтых гадоў ніхто не толькі не спрабаваў звязацца — мне падаецца, што нас проста ігнаравалі”.

Юрыста Алега Воўчака, які прадстаўляе інтарэсы пацярпелых, апошні раз следчая апытвала ў тым самым 1999 годзе.

У Алега Воўчака ёсць свая версія таго, чаму следства працягваюць, а не прыпыняюць.

Алег Воўчак: “Гэтыя ўсе справы на ўліку Камітэта ААН па правах чалавека, ёсць працоўная група па гвалтоўным знікненні ў Парламенцкай асамблеі. Калі справу прыпыніць, неабходна даваць больш падрабязную інфармацыю гэтым структурам. А што даваць? Таму яны абралі тактыку расследаваць да 2015 года, а потым проста закрыць у сувязі з заканчэннем тэрміна пазоўнай даўніны і прыцягнення абвінавачаных да крымінальнай адказнасці”.

Справа Захаранкі была распачатая паводле Крымінальнага кодэкса ў рэдакцыі 1960 года. Па ім дастаткова 15 гадоў, каб справу спыніць з-за немагчымасці знайсці вінаватых. Паводле новай рэдакцыі для закрыцця справы неабходна 25 гадоў.

Выглядае на тое, што такую форму вядзення справы следчыя абралі, каб не даць магчымасці азнаёміцца з яе матэрыяламі. Рабіць гэта забаронена, пакуль вядзецца следства. Нават — адказваць пра ход следства.

Як падлічыла Еўрарадыё, з 1999 года справу Захаранкі вялі 4 (!) следчыя, цяпер над ёй працуе пяты. Гэта без уліку следчай групы, якая была створана адразу пасля знікнення генерала. Першым следчым была Святлана Байкова. Яе ў 2010 годзе арыштавалі па абвінавачванні ў перавышэнні службовых паўнамоцтваў.

Які лёс чакае справу Захаранкі пасля 2015 года?

Алег Воўчак: “Будзе пракуратура вырашаць: на ўтылізацыю яе ці грыф сакрэтнасці паставіць, калі там дзяржаўныя інтарэсы закранутыя, — на 20, на 50 гадоў”.

Нагадаю, генерал Захаранка знік увечары 7 траўня 1999 года. У адпаведнасці з артыкулам 101 Крымінальнага кодэкса — забойства — была распачатая справа. Паводле слоў былога начальніка СІЗА №1 Алега Алкаева, Юры Захаранка быў скрадзены, а пасля расстраляны.